नाउपा पनि सरकारमा, ३ राज्यमन्त्रीले लिए शपथ

काठमाडौँ- प्रधानमन्त्री केपी शर्मा ओलीसमक्ष नवनियुक्त तीन राज्यमन्त्रीले पद तथा गोपनीयताको शपथ लिएका छन्।

प्रधानमन्त्री तथा मन्त्रिपरिषद्को कार्यालय सिंहदरबारमा आयोजित समारोहमा प्रधानमन्त्री ओलीसमक्ष तीन राज्यमन्त्रीले शपथ लिएका हुन्।

सपथ लिनेमा संस्कृति, पर्यटन तथा नागरिक उड्डयन राज्यमन्त्री अरुणकुमार चौधरी छन्। उनी नाउपाबाट राज्यमन्त्री बनेका हुन्।

यस्तै वन तथा वातावरण राज्यमन्त्री रुपा विक र ऊर्जा, जलस्रोत र सिँचाई राज्यमन्त्री पूर्णबहादुर तामाङ पनि छन्। उनीहरू दुवै जना कांग्रेसका तर्फबाट राज्यमन्त्री बनेका हुन्।

सपथ कार्यक्रममा उपप्रधानमन्त्रीहरू, मन्त्रीहरू, मुख्यसचिवलगायतका अधिकारी सहभागी थिए।

प्रधानमन्त्री ओली गत असार ३० गते नियुक्त भएका थिए।

योसँगै मन्त्रिपरिषदले पूर्णता पाएको छ। नेपालको संविधानको धारा ७६ को उपधारा ९ मा बढीमा पच्चीस सदस्यीय मन्त्रिपरिषद गठन हुने व्यवस्था छ।

यसअघि नै प्रधानमन्त्री र उपप्रधानमन्त्रीसहित २२ जना मन्त्रीहरू भएको र अब ३ जना राज्यमन्त्री थपिएर २५ जना पुगेकाले मन्त्रिपरिषदले पूर्णता पाएको हो।

असार १७ गते कांग्रेस र एमालेबीच सरकार बनाउने समझदारी भएपछि असार ३१ गते ओलीले प्रधानमन्त्रीका रूपमा शपथ लिएका थिए।

कांग्रेसका ८८ सांसद र एमालेका ७८ सांसदको समर्थनमा ओली प्रधानमन्त्री नियुक्त भएका हुन्। ओलीको चौथो पटक प्रधानमन्त्री बनेका हुन्।

तीन वर्षअघि अर्थात् २०७८ असार २८ गते सर्वोच्च अदालतको संवैधानिक इजलासको परमादेशबाट एमाले अध्यक्ष केपी शर्मा ओली सत्ताच्यूत भएका थिए।

असार ३१ गते नै २१ जना मन्त्रीले शपथ लिएका थिए।

ओली नेतृत्वको सरकारमा कांग्रेस, एमाले, जनता समाजवादी पार्टी, लोकतान्त्रिक समाजवादी पार्टी र उन्मुक्ति सहभागी भएका छन्।

यस्तो बन्यो ओली क्याबिनेट
केपी शर्मा ओली : प्रधानमन्त्री

प्रकाशमान सिंह : उपप्रधानमन्त्री तथा सहरी विकासमन्त्री

विष्णु पौडेल : उपप्रधानमन्त्री तथा अर्थमन्त्री

पृथ्वी सुब्बा गुरुङ : सञ्चारमन्त्री

रमेश लेखक : गृहमन्त्री

शरदसिंह भण्डारी : श्रममन्त्री

डा आरजु राणा : परराष्ट्रमन्त्री

प्रदिप यादव : खानेपानीमन्त्री

बलराम अधिकारी : भूमि व्यवस्था गरिबी निवारण तथा सहकारीमन्त्री

दामोदर भण्डरी : उद्योगमन्त्री

नवल किशोर साह सुडी : महिला बालबालिका तथा समाजकल्याणमन्त्री

देवेन्द्र दाहाल : भौतिक पूर्वाधारमन्त्री

तेजुलाल चौधरी : युवा तथा खेलकुदमन्त्री

प्रदीप पौडेल : स्वास्थ्यमन्त्री

अजय कुमार चौरसीया : कानुनमन्त्री

बद्री पाण्डे : संस्कृति पर्यटन तथा नागरिक उड्डयनमन्त्री

रामनाथ अधिकारी : कृषिमन्त्री

विद्या भट्टराई : शिक्षामन्त्री

मानवीर राई : रक्षामन्त्री

दीपक खड्का : उर्जा जलस्रोत तथा सिँचाइमन्त्री

राजकुमार गुप्ता : संघीय मामिलामन्त्री

ऐन बहादुर शाही : वनमन्त्री

राज्यमन्त्री
अरुणकुमार चौधरी : संस्कृति, पर्यटन तथा नागरिक उड्डयन राज्यमन्त्री

रुपा विक : वन तथा वातावरण राज्यमन्त्री

पूर्णबहादुर तामाङ : ऊर्जा, जलस्रोत र सिँचाई राज्यमन्त्री