न्यूनतम साझा कार्यक्रम कार्यदलमा सत्तारुढ नै समेटिएनन्

काठमाडौँ- सरकारको न्यूनतम साझा कार्यक्रमको मस्यौदा तयार पार्न नेपाली कांग्रेस र नेकपा एमालेले कार्यदल गठन गरेका छन्।

प्रधानमन्त्रीको सरकारी निवास बालुवाटारमा बसेको कांग्रेस-एमालेका शीर्ष नेताले छलफल गरी मस्यौदाका लागि कार्यदल गठन गरेका हुन्।

कार्यदलमा नेपाली कांग्रेसका महामन्त्री गगन थापा र प्रकाशशरण महत छन् भने एमालेबाट उपमहासचिवद्वदय प्रदीप ज्ञवाली र विष्णु रिमाल छन्।

सत्ताका ठूला दलले कार्यदल गठनमा साना दललाई भने बेवास्ता गरेका छन्। सरकारमा जसपा, लोसपा र नाउपा सहभागी भएपनि उनीहरूका प्रतिनिधि भने सहभागी छैनन्। कार्यदलले सरकारको न्यूनतम साझा कार्यक्रमबारे अरु सत्तारुढ दलहरुसँग पनि छलफल गर्ने छ।

आइतबार साँझ कांग्रेसका सभापति शेरबहादुर देउवाले सरकारको न्यूनतम साझा कार्यक्रम बनाउन प्रधानमन्त्री केपी शर्मा ओलीसँग प्रस्ताव गरेका थिए।

आइतबारको बैठकमा देउवाका साथमा परराष्ट्रमन्त्री आरजु देउवा र गृहमन्त्री रमेश लेखक पनि थिए। एमालेबाट प्रधानमन्त्री ओलीका साथै उपप्रधान तथा अर्थमन्त्री विष्णु पौडेल र महासचिव शंकर पोखरेल बैठकमा सहभागी थिए।

कांग्रेस र एमालेबीच असार १७ गते सातबुँदे सहमति भएअनुसार कांग्रेसको समर्थनमा एमाले अध्यक्ष ओली असार ३० गते प्रधानमन्त्री नियुक्त भएका थिए।

ओली सरकारमा जसपा, लोसपा र नउपा जनमतका सांसद पनि मन्त्री छन् भने जनमत पार्टीको पनि समर्थन छ। सरकार बनेको दुई महिना पुग्न लाग्दा पनि न्यूनतम साझा कार्यक्रम भने बनेको छैन।