रास्वपा आन्दोलनबारे देउवाले भने- हाम्रा साथीलाई मुद्दा लाग्दा कहिल्यै होहल्ला गरेनौँ

धनगढी- नेपाली कांग्रेसका सभापति शेरबहादुर देउवाले वर्तमान कांग्रेस–एमालेको गठबन्धन सरकार २०८४ सम्मै जाने बताएका छन् ।

धनगढी विमानस्थलमा आज पत्रकारसँग संक्षिप्त कुरा गर्दै पूर्वप्रधानमन्त्री समेत रहेका देउवाले वर्तमान गठबन्धनमा कुनै समस्या नरहेकाले यो पूरै कार्यकाल टिक्ने विश्वास व्यक्त गरे । सहकारी प्रकरणका विषयमा सोधिएको प्रश्नमा देउवाले भने, “हाम्रा साथीलाई मुद्दा लाग्दा हामीले कहिल्यै होहल्ला गरेनौँ, यो अदालती प्रक्रियामा छ ।”

देउवाले सरकारलाई कमजोर पार्न ‘सरकार ढल्छ’ भन्ने गलत हल्ला फैलाइएको आरोप लगाउँदै यसमा विश्वास नगर्न आग्रह गरे । वर्तमान समस्या समाधान गर्न र अस्थिर सरकारलाई स्थिर बनाउन नेकपा (एमाले)सँगको समिकरण बनेकाले कम्तीमा अर्को चुनावसम्म यही समीकरणले निरन्तरता पाउने उनले दाबी गरे ।

देउवा गृह जिल्ला डडेल्धुराका विभिन्न कार्यक्रममा सहभागी हुन जानेक्रममा आज धनगढी पुगेका हुन् । कांग्रेस सुदूरपश्चिम प्रदेश कार्यसमितिका प्रवक्ता सुरत रावतले सभापति देउवा पार्टीको जिल्ला कार्यसमिति बैठक, पालिकास्तरीय भेटघाट, उग्रतारामा लाग्ने मेला, गन्यापधुरा गाउँपालिकामा हुने कार्यक्रममा सहभागी हुने जानकारी दिए।