विराटनगरविरुद्ध सुदूरपश्चिमको सानदार जित

काठमाडौँ- नेपाल प्रिमियर लिग (एनपीएल)अन्तर्गत मंगलबार भएको खेलमा सुदूरपश्चिम रोयल्सले सानदार जित निकालेको छ।

विराटनगर किङ्सलाई फराकिलो अन्तरले पराजित गर्दै सुदूरपश्चिमले उत्साहजनक जित निकालेको हो।

त्रिवि क्रिकेट मैदानमा सुदूरपश्चिमले दिएको १८३ रनको लक्ष्य विराटनगरका लागि महँगो सावित भयो।

विराटनगरले १६.१ ओभर खेल्दै पुरै विकेट गुमाएर जम्मा ९२ रन मात्र जोड्न सफल भएको हो।

विराटनगरका बसिर अहमदले सर्वाधिक २४ रन बनाउँदा राजेश पुलामी १५ रन बनाएर आउट भए।

मार्की खेलाडी सन्दीप लामिछाने ८ रनमै समेटिए। विराटनगरका मार्टिन गुप्टिल ० रनमै आउट भएका थिए।

सुदूरका स्कट कुगेलेइन र अविनाश बोहराले ३-३ विकेट लिए। ब्रान्डन म्याकमुलेन, साइफ जाइब र इशान पाण्डेयले समान एकएक विकेट लिएका थिए।

टस हारेर ब्याटिङमा उत्रिएको सुदूरपश्चिमले निर्धारित २० ओभरमा ७ विकेट गुमाएर १८२ रन बनाएको थियो।

ऐरीले ५७, ब्रान्डन म्याकमुलेनले ३६, विनोद भण्डारीले २३ रन, इशान पाण्डेयले २१,साइफ जाइबले १४, स्कट कुगेलेइनले १० रन बनाएका थिए। अन्य खेलाडीले दोहोरो अंक बटुल्न सकेनन्।

बलिङमा अनिल खरेलले ३ विकेट लिए। क्रिस सोल, इस्मत आलम र बसिर अहमदले समान एकएक विकेट लिएका थिए।

सुदूरपश्चिमबाट विराटनगरले पाएको यो लक्ष्य एनपीएलमा हालसम्मकै ठूलो हो।

यसअघि, सोमबारको खेलमा कर्णाली याक्सले जनकपुर बोल्ट्सविरुद्ध १४१ रन बनाएको थियो।

यसअघि विराटनगरले जनकपुर बोल्टसँग ८ विकेटले पराजित भएको थियो।