सहकारीमन्त्रीलाई राष्ट्रपतिको प्रश्न- पीडितलाई न्याय दिने प्रक्रिया कहाँ पुग्यो?

काठमाडौँ- राष्ट्रपति रामचन्द्र पौडेलले सहकारी क्षेत्रमा देखिएको समस्याका बारेमा चासो व्यक्त गरेका छन्।

मंगलबार राष्ट्रपति भवन शीतल निवासमा भूमि व्यवस्था, सहकारी तथा गरिबी निवारणमन्त्री बलराम अधिकारी र सचिव अर्जुनप्रसाद पोखरेलसँगको भेटमा सहकारी समस्या बारेमा चासो व्यक्त गरेका हुन्।

राष्ट्रपति पौडेलले सहकारीका समस्याका कारण मारमा परेका नागरिकलाई छिटो न्याय दिन र यस क्षेत्रको समस्यालाई छिटो टुंगो लगाउन निर्देशन दिएको राष्ट्रपतिका प्रेस सल्लाहकार किरण पोखरेलले जानकारी दिए। उनले पीडितलाई न्याय दिने प्रक्रियाका विषयमा पनि चासो राखेका थिए।

‘सहकारीका समस्याका कारण मारमा परेका नागरिकलाई छिटो न्याय दिन र समस्या छिटो टुंगो लगाउने प्रक्रियामा सरकारले कसरी काम गरिरहेको छ?,’ मन्त्री अधिकारी र सचिव पोखरेलसँग राष्ट्रपतिले राखेको जिज्ञासालाई उद्धृत गर्दै राष्ट्रपतिका प्रेस सल्लाहकार किरण पोखरेलले भने, ‘पीडितलाई न्याय दिने प्रक्रियामा सरकार गम्भीर भएर लाग्नुपर्‍यो।’

राष्ट्रपति पौडेलले सहकारीका साना बचतकर्ताको रकम फिर्ताका सम्बन्धमा सरकार गम्भीर भएर लाग्न भनेका थिए।

मन्त्री अधिकारीले केन्द्रीयस्तरमा दर्ता भएका ४७ मध्ये २३ वटा सहकारीलाई संकटग्रस्त घोषणा गरी तदारुकताका साथ काम भइरहेको र ३ वटा सहकारीको समस्या समाधान गरिसकेको तथा बाँकी सहकारीको समस्या समाधानका लागि सरकारले काम गरिरहेको जानकारी गराएका थिए।

लामो समयदेखि सहकारी पीडितहरूले आन्दोलन गरिरहेका छन्।