जीवित छँदा प्रदीपले भनेका थिए- पार्टीको झण्डा नओढाउनू, अर्थमन्त्रीले ओढाए राष्ट्रिय झण्डा

काठमाडौं- वामपन्थी नेता प्रदीप नेपालको पशुपति आर्यघाटमा अन्त्येष्टि सुरु गरिएको छ। उनको पार्थिव शरीरमा एमाले उपाध्यक्ष समेत रहेका अर्थमन्त्री विष्णु पौडेलले राष्ट्रिय झण्डा ओढाएर अन्तिम श्रद्धाञ्जलि अर्पण गरेका हुन्।

स्वर्गीय नेपालले मंगलबार नर्भिक अस्पतालमा निधन भएपछि एमाले कार्यालय राख्ने भन्नेबारे नेताहरूबीच छलफल भएको थियो। तर, नेता नेपालले आफ्नो मृत्युपछि कुनै पनि पार्टीको झण्डा नओढाउनू भनेको भन्दै घरपरिवारले नमानेपछि उनलाई श्रद्धाञ्जलिका लागि एमालेको कार्यालय च्यासलमा नलगिएको हो।

कुनै पनि पार्टीकरण नगर्ने र झण्डा नओढाउने भनेपछि श्रद्धाञ्जलिका लागि नराख्ने कुरा भएको एमालेका एक नेताले जानकारी दिए।

नेपाललाई राष्ट्रिय सम्मान दिने निर्णय सरकारले गरेको छ।

नेपाललाई श्रद्धाञ्जली दिन प्रधानमन्त्री केपी शर्मा ओली नर्भिक अस्पताल जाने तयारीमा रहेका थिए। तर, मृत्युपूर्व नेपालले नै आफ्नो मृत्युपछि श्रद्धाञ्जली सभा पनि नराख्नु भनेको भन्दै नेपाल परिवारले ओलीलाई जानकारी गराएको थियो। झण्डा ओढाउन पनि नपाइने र श्रद्धाञ्जलि सभा पनि नराख्ने कुरा परिवारले गरेपछि ओली गएनन्।

यस्तै, एकीकृत समाजवादीका अध्यक्ष माधवकुमार नेपाल, माओवादी केन्द्रका अध्यक्ष पुष्पकमल दाहाललगायतका नेता पनि नर्भिक आउने तयारीमा थिए। तर श्रद्धाञ्जली सभा नै नराखिएपछि उनीहरू गएनन्।

प्रदीप नेपालले जीवित छँदा दिएको एक अन्तर्वार्तामा आफूलाई पार्टीको झण्डा नओढाउन र मृत्युपछि भिडभाड नगर्न आग्रह गरेका थिए। त्यही अनुसार पार्टी कार्यालयमा लैजाने, पार्टीको झण्डा ओढाउनेसहितका कार्यक्रम नगरिएको हो।

नेपाल लामो समयदेखि पार्किन्सन रोगबाट पीडित थिए। केही वर्षदेखि उनी राजनीतिक गतिविधिमा निष्क्रिय थिए। उनी पूर्व शिक्षामन्त्री, सञ्चार, सूचना तथा प्रविधिमन्त्री पनि बनेका थिए। नेपाल नेकपा एमालेका पूर्व स्थायी कमिटी सदस्य समेत थिए।

पछिल्लो समय नेकपा एमाले विभाजन भएपछि माधव नेपाल नेतृत्वको नेकपा एकीकृत समाजवादीले उनलाई सल्लाहकार बनाएको थियो। साहित्य लेखनमा समेत रुची राख्ने नेपालले पञ्चायतकालमा सञ्जय थापाको नामबाट प्रगतिशील साहित्य लेख्ने गरेका थिए।

नेकपा माओवादी केन्द्रका अध्यक्ष पुष्पकमल दाहाल प्रचण्डले नेपाली वामपन्थी आन्दोलनका नेता प्रदीप नेपालको निधनप्रति दुःख व्यक्त गरेका छन्। नेता नेपालको निधनले आफू मर्माहित भएको सामाजिक सञ्जालमा प्रचण्डले उल्लेख गरेका छन्।

‘नेपाली वामपन्थी आन्दोलनका प्रखर नेता तथा वौद्धिक व्यक्तित्व कमरेड प्रदीप नेपालको दुःखद निधनले मर्माहित भएको छु। निरंकुशताविरुद्ध लोकतन्त्र, सामाजिक न्याय र परिवर्तनको यात्रामा उहाँको योगदान अविस्मरणीय रहनेछ। वहाँप्रति हार्दिक श्रद्धाञ्जली अर्पण गर्दै शोकसन्तप्त परिवार तथा आफन्तजनमा गहिरो समवेदना प्रकट गर्दछु,’ सामाजिक सञ्जालमा प्रचण्डले लेखेका छन्।