उपेन्द्र महतोको मेडिसिटी हस्पिटलको व्यापार दुई अर्ब ५५ करोड, ऋण पाँच अर्ब

काठमाडौंः व्यवसायी डा. उपेन्द्र महतोले सञ्चालन गरिरहेको मेडिसिटी हस्पिटलको व्यापारमा कमी आएको छ। २०२५ मा मेडिसिटीले दुई अर्ब ५५ करोड ५० लाख रुपैयाँको व्यापार गरेको छ।

गत वर्ष सन् २०२४ मा मेडिसिटीको व्यापार दुई अर्ब ७४ करोड ४० लाख रुपैयाँ थियो। एक वर्षको अवधिमा मेडिसिटी हस्पिटलको व्यापार झण्डै १९ करोड रुपैयाँ घटेको मेडिसिटीको सञ्चालक अश्विन मेडिकल कलेज एण्ड हस्पिटल प्राइभेट लिमिटेडले जनाएको छ।

गत वर्षको असोज १२ गते गएको भीषण बाढीले क्षति पुर्याउँदा अस्पताल सञ्चालनमा अस्थायी अवरोध आएको कारणले गर्दा आम्दानीमा गिरावट आएको मेडिसिटीले जनाएको छ।

आम्दानी कम भएपछि हस्पिटलको पीपीआइएलटीडी मार्जिन गत वर्ष घटेर २०२५ मा २१.५३ प्रतिशतमा सीमित भएको छ । गत वर्ष यस्तो मार्जिन २७.७८ प्रतिशत थियो।

बाढीका कारण सञ्चालन अवरोध र भएको क्षतिको मर्मतमा खर्च गर्दा गत वर्ष ३२ करोड ४० रुपैयाँ खुद घाटा भएको अश्विन मेडिकल कलेजले जनाएको छ। अस्पताल परिसरमा नख्खुखोला रहेको छ । खोलाले भारी वर्षाको समयमा बाढीको जोखिम निम्त्याउने गरेको छ । भौगोलिक स्थितिले बाढी आएपछि अस्पताल परिसरमा पानी पस्ने गर्दा सञ्चालन अवरोध आउने गरेको मेडिसिटीले जनाएको छ।

गत असोज १२ मा “नदीमा पानीको बहाव बढ्यो र अस्पतालका केही भागहरू डुबानमा परे, जसले गर्दा नियमित सेवाहरूमा बाधा पुग्यो, बिरामीहरूको आवतजावत घट्यो र सञ्चालन आम्दानीमा उल्लेखनीय गिरावट आयो” मेडिसिटीले भनेको छ।

सेप्टेम्बर २०२४ भन्दा पहिले नख्खु नदीमा कुनै पनि ठूला बाढी आएको रेकर्ड नभएको हस्पिटलले जनाएको छ। जसले गर्दा यो घटना आकस्मिक थियो भन्ने संकेत गरेको हस्पिटलको भनाई छ।

महतो ग्रुप अफ इन्डस्ट्रिजले सञ्चालन गरिरहेको मेडिसिटी हस्पिटलले सन् २०१७ देखि सञ्चालन सुरु गरेको थियो । नेपाल मेडिसिटी अस्पताल देशको पहिलो हस्पिटल एण्ड हेल्थकेयर प्रोभाइडर्स इन्टरनेशनलद्वारा मान्यता प्राप्त स्वास्थ्य संस्था हो।

अस्पतालको क्षमता २४७ शैया क्षमता छ । अस्पतालले मल्टिस्पेसियालिटी स्वास्थ्य सेवा सुविधा प्रदान गर्दैै आएको छ। अस्पताल ललितपुर महानगरको नख्खुमा रहेको छ।
हस्पिटलले सन् २०२३ मा दुई अर्ब ८२ करोड ६० लाख र २०२२ मा दुई अर्ब ७८ करोड ४० लाख रुपैयाँ कारोबार गरेको सार्वजनिक गरिएको वित्तीय विवरणमा उल्लेख छ। हस्पिटलले चार अर्ब ९४ करोड रुपैयाँ ऋण रहेको रेटिङका लागि सार्वजनिक गरेको वित्तीय विवरणमा उल्लेख छ।

हस्पिटलले ऋणका लागि डबल बि देखि ए फोर रेटिङ पाएको छ। हस्पिटलले चार मध्ये तीन बैंकसँग सहवित्तीयकरण (कन्सोर्टियम लोन) ऋणअन्तगर्त फ्लोटिङ ब्याजदर सम्झौता गरेको छ । जबकि एउटा बैंकसँग निश्चित ब्याजदर कायम राखेको छ । ऋणबाट सञ्चालित परियोजना भएकोले, परिकल्पना गरिएको भन्दा बढी ब्याजदरले कम्पनीको मार्जिन संकुचित हुन सक्छ।

उपत्यकामा धेरै ठूला अस्पताल सञ्चालनमा भएकाले कडा प्रतिस्पर्धा रहेको अश्विन मेडिकलले जनाएको छ।

उद्यमी महतोले मेडिसिटीका साथै मेडिकेयर अस्पताल सञ्चालन गरिरहेका छन्। डा. महतोको स्वास्थ्य, जलविद्युत, निर्माण र मिडिया क्षेत्रहरूमा लगानी विविधिकरण गरेका छन्। उनी गैरआवासिय नेपाली संघ (एनआरएनए) का संस्थापक अध्यक्ष पनि हुन्।

स्वास्थ्य सेवा राजस्व र रोजगारी दुवैको हिसाबले नेपालको सबैभन्दा ठूलो क्षेत्रहरू मध्ये एक बनेको छ। स्वास्थ्य सेवामा अस्पताल, चिकित्सा उपकरणहरू, क्लिनिकल परीक्षणहरू, आउटसोर्सिङ, टेलिमेडिसिन, चिकित्सा पर्यटन, स्वास्थ्य बिमा र चिकित्सा उपकरणहरू समावेश छन्।

नेपालको कूल ग्राहस्र्थ उत्पादन (जीडीपी) मा सेवा क्षेत्रको योगदान धेरै माथि पुगिसेको छ । सेवा क्षेत्रको वृद्धि ४.२१ प्रतिशत रहेको अनुमान छ। आर्थिक वर्ष २०८१/८२ मा कुल गार्हस्थ्य उत्पादनमा कृषि, उद्योग र सेवा क्षेत्रको अंश क्रमशः २५.१६ प्रतिशत, १२.८३ प्रतिशत र ६२.०१ प्रतिशत रहेको छ।