सुनको मूल्यले फेरि बनायो नयाँ रेकर्ड

काठमाडौँ: नेपाली बजारमा सुनको मूल्यले फेरि नयाँ रेकर्ड बनाएको छ। नेपाल सुनचाँदी व्यवसायी महासंघका अनुसार आज सुन प्रतितोला २ लाख २३ हजार रुपैयाँमा कारोबार भैरहेको छ। जुन हालसम्मकै सर्वाधिक महँगो हो।

यसअघि मंगलबार १३ सय रुपैयाँले बढेर सुन तोलाको २ लाख २१ हजार ७०० कीर्तिमानी मूल्यमा कारोबार भएको थियो।

यस्तै आज चाँदीको मूल्यले पनि कीर्तिमानी रेकर्ड बनाएका छन्। यसदिन चाँदी तोलामा २० रुपैयाँले बढेर २ हजार ७०० रुपैयाँमा कारोबार भैरहेको छ, जुन हालसम्मकै उच्च हो।

पछिल्ला दिनहरूमा सुनको मूल्य निरन्तर बढ्दै गएको छ। नेपालमा सुनको मूल्य बढ्नुको प्रमुख कारणमध्ये एक विश्व बजारमै सुनको मूल्य बढ्नु हो। विश्व अर्थतन्त्रमा अनिश्चितता बढ्दा, जस्तै अमेरिका–चीन व्यापार द्वन्द्व, युरोपेली बजारमा महँगी, वा मध्यपूर्वमा युद्धजस्ता घटनाले लगानीकर्तालाई सुरक्षित विकल्पतर्फ आकर्षित गर्छन्। सुनलाई ‘सेफ हेवन’ (सुरक्षित आश्रय) मानिने भएकाले यस्ता घटनामा यसको मूल्य आकस्मिक रूपमा बढ्छ।

त्यसैगरी, नेपालले सुन आयात गर्ने क्रममा अमेरिकी डलरमा भुक्तानी गर्नुपर्छ। डलर बलियो हुँदा रुपैयाँ कमजोर बन्छ, जसको सीधा असर सुनको मूल्यमा पर्छ। पछिल्ला वर्षहरूमा रुपैयाँ कमजोर बन्दै गएकोले आयातित सुनको मूल्य बढ्न गएको हो।

यसका साथै विश्वका विकसित मुलुकहरुले नै यतिबेला अमेरिकी डलरलाई रिजर्भ करेन्सीबाट हटाएर विकल्प खोज्न थालेकाले गर्दा त्यसको प्रत्यक्ष प्रभाव विश्वको अर्थमन्त्रमापर्न गई सुनको मूल्य निरन्तर उकालो लागिरहेको छ।