भोटेकोशीको शेयर जेनजी पब्लिकलाई नि:शुल्क दिइएको हैन : इप्पान

काठमाडौँ: स्वतन्त्र ऊर्जा उत्पादकहरूको संस्था, नेपाल (इप्पान) ले भोटेकोशी पावर कम्पनीले भोटेकोशी जेनजी पब्लिक इनभेस्टमेन्ट पब्लिक लिमिटेडलाई निःशुल्क शेयर नदिएको स्पष्ट पारेको छ। इप्पानले बुधबार प्रेस विज्ञप्ति जारी गरी असोज २६ गते सिन्धुपाल्चोकको भोटेकोशीका स्थानीय बासिन्दाहरूको प्रतिनिधित्व गर्ने भोटेकोशी जेनजी पब्लिक इनभेष्टमेन्ट र भोटेकोशी पावर कम्पनीबीच निःशुल्क शेयर दिनेगरी सहमति भएको भन्ने बारेमा विभिन्न सञ्चार माध्यममा प्रकाशित समाचारप्रति ध्यानाकर्षण भएको जनाएको छ।

दुवै कम्पनीबीच निःशुल्क शेयर लिने दिने सहमति नभएको स्पष्ट विज्ञप्तिमा बताइएको छ।

भोटेकोशी आयोजनाबाट जेनजीले १९ करोडको शेयर पाउने, कम्पनीको जमानीमा बैंकबाट ऋण लिइने

भोटेकोशी जेनजी पब्लिक इनभेस्टमेन्ट पब्लिक लिमिटेडले कम्पनीको १० प्रतिशत शेयरको लागि आवेदन दिन अगाडि जलविद्युत उत्पादन क्षेत्रका स्थानिय तहका प्रत्यक्ष प्रभावित स्थानीय जनतालाई पब्लिक लिमिटेड कम्पनीको शेयरधनी बनाइसकेपछि मात्र कम्पनीले प्रतिशेयर बराबर अंकित मुल्य १०० रुपैयाँका दरले १० प्रतिशत मात्र उल्लेखित पब्लिक लिमिटेड कम्पनीलाई बिक्री गर्ने सहमति गरेको स्पष्ट पारेको छ।

जेनजी पब्लिक लिमिटेड कम्पनीले उल्लेखित शेयर खरिद गर्नको लागि चाहिने ऋण बैंकबाट लिने र सो ऋणको लागि भोटेकोशी पावर कम्पनीले जमानी मात्रको व्यबस्था मिलाउने सहमति भएको इप्पानले जानकारी दिएको छ।

निर्माण सम्पन्न भइसकेको आयोजना भएकाले भोटेकोशीले वार्षिक रुपमा वितरण गर्ने लाभांशबाट १० प्रतिशत शेयरबापत उक्त पब्लिक लिमिटेड कम्पनीले पाउने रकम सोही पब्लिक लिमिटेड कम्पनीले लिएको ऋण तथा ब्याज तिर्नका लागि उपयोग गर्ने गरी सहमति भएकोले यसलाई निःशुल्क शेयर दिने गरी सहमति भएको भन्ने भ्रममा नपर्न सम्पूर्ण सञ्चारमाध्यम लगायत सरोकारवाला निकायलाई इप्पानेल अनुरोध गरेको छ।