सहास ऊर्जाको साधारणसभाः बूढीगण्डकी आयोजना बनाउन हकप्रद सेयरबाट चार अर्ब ५७ करोड जुटाउने

काठमाडौं। नेपाल स्टक एक्सचेन्ज (नेप्से) लिमिटेडमा सूचिकृत साहस ऊर्जा लिमिटेडले ३४१ मेगावाट क्षमताको बुढीगण्डकी अर्धजलासय जलविद्युत आयोजना बनाउन सत्प्रतिशत हकप्रद सेयर निष्कासन गर्ने भएको छ।

कम्पनीको बुधबार राजधानीमा सम्पन्न १२ औं वार्षिका साधारणसभाले सतप्रतिशत हकप्रद सेयर निष्कासनको प्रस्ताव पारित गरेको अध्यक्ष हिमप्रसाद पाठकले नेपाल क्लिक्सलाई बताए।

साधारणसभाले पारित गरेपछि कम्पनीलाई हकप्रद सेयर जारी गर्न बाटो खुलेको छ।

नियामक विद्युत नियमन आयोग र नेपाल धितोपत्र बोर्डबाट अन्तिम स्वीकृति पाएपछि हकप्रद सेयर निष्कासन हुनेछ।

सभाले गत आर्थिक वर्षमा गरेको नाफाबाट सेयरधनीलाई २१ प्रतिशत बोनस सेयर दिने प्रस्ताव गरेको छ। उक्त बोनस सेयर वितरणमा लाग्ने कर १.१० प्रतिशत रहेको छ।

प्रस्तावित बोनस सेयर वितरणपछि कम्पनीको चुक्ता पुँजी बढेर चार अर्ब ५७ करोड ३८ लाख रुपैयाँ पुग्नेछ। सोही रकमबराबर बोनस सेयर निष्कासन गरेर आयोजनालाई लगानी जुटाउने तयारी कम्पनीको छ।

हकप्रद सेयर जारीपछि सहास ऊर्जाको चुक्ता पुँजी दोब्बर बढेर नौ अर्ब १४ करोड ७६ लाख रुपैयाँ पुग्नेछ। गत आर्थिक वर्षमा कम्पनीले ९० करोड २७ लाख रुपैयाँ खुदनाफा गरेको छ। गत वर्ष सहास ऊर्जाले बिजुली बेचेर दुई अर्ब ६४ करोड ८१ लाख रुपैयाँ आम्दानी गरेको छ।

अघिल्लो वर्ष साहस ऊर्जाले बिजुली बेचेर दुई अर्ब ४४ करोड ७५ लाख रुपैयाँ आम्दानी गरेको थियो।

सहास ऊर्जाले बुढीगण्डकी आयोजना व्यवसायी दीपक मल्होत्राबाट दुई अर्ब रुपैयाँमा खरिद गरेको हो। उनले टाइम्स इनर्जीमार्फत आयोजना बनाउन लागेका थिए।

साहस ऊर्जाको २१ प्रतिशत बोनस सेयर, ३४१ मेगावाटको बुढीगण्डकी बनाउन हकप्रद सेयर जारी गर्ने

उनलाई लगानी जुटाउन नसकेका बेला साहस ऊर्जाले आयोजनाको स्वामित्व खरिद गरेको हो। बूढीगण्डकी निजी क्षेत्रले बनाउन लागेको सबैभन्दा ठूला जलविद्युत आयोजना हो।

नेपाल विद्युत प्राधिकरण र आयोजनाबीच विद्युत खरिद–बिक्री सम्झौता (पीपीए) भइसकेको छ। आयोजना बनाउन ५१ अर्ब रुपैयाँ लाग्ने अध्ययनले देखाएको छ।

अर्धजलाशय आयोजनाबाट वार्षिक १ अर्ब ८३ करोड ७१ लाख ६० हजार युनिट बिजुली उत्पादन हुने अध्ययनले देखाएको छ।

आयोजनाको डिजाइन बहाब १ सय घनमिटर प्रतिसेकेन्ड छ। कुल हेड ३९८ मिटर रहने छ।

सुक्खायाममा पनि आयोजना दैनिक पाँच घन्टा पूर्ण क्षमतामा सञ्चालन गर्न सकिने अध्ययनले देखाएको छ। दैनिक पाँच घन्टा पिकिङ हुने गरी आयोजना डिजाइन गरिएको कम्पनीले जनाएको छ।

आयोजनाको मुख्य संरचना बुढीगण्डकी नदीको दायाँ किनारमा प्रस्ताव गरिएको छ। बुढीगण्डकीमा बाँध बाँधी नदीको दायाँपट्टि निर्माण हुने इन्टेकबाट पानी फर्काइ मुख्य संरचनाबाट भूमिगत सुरुङमा लगिने छ।

बिजुली उत्पादनका लागि बनाइने बाँधको लम्बाइ ५४ मिटर हुनेछ। बाँधमा १७ लाख घनमिटर पानी सञ्चय गर्न सकिने छ। बाँधको उचाइ ३८ मिटर हुने कम्पनीले जनाएको छ।

विद्युतगृहमा ५७ मेगावाट क्षमताका ६ वटा भर्टिकल एक्सेस पेल्टर्न टर्बाइन जडान गरिने छ।

आयोजनाबाट उत्पादन हुने बिजुली २२० केभी प्रसारण लाइन हुँदै ४५ किलोमिटर दुरीमा रहेको नुवाकोटमा बन्ने मिलेनियम च्यालेन्ज कर्पोरेसन (एमसीसी) ले बनाइरहेको ४०० केभी क्षमताको रातमाटे सबस्टेसनमा समाहित हनेछ।

आयोजना गण्डकी प्रदेश गोरखाको चुमनब्री र धार्चे गाउँपालिकामा पर्छ ।

साहस ऊर्जाले ८६ मेगावाटको सोलुखोला (दुधकोसी) आयोजना बनाई अहिले सञ्चालन गरिरहेको छ। आयोजनाले २०७९ माघ अन्तिम सातादेखि व्यावसायिक उत्पादन थालेको हो। यस्तै कम्पनीले पाँच मेगावाटको हुग्दी खोला आयोजना पनि सञ्चालन गरिरहेको छ।