जलविद्युतमा लगानी बढाउदै सिंगटी हाइड्रो, नारखोला र मोदी लान्द्रुक आयोजनामा दुई अर्ब लगानी

काठमाडौं। नेपाल स्टक एक्सचेन्ज (नेप्से) मा सूचिकृत सिंगटी हाइड्रो इनर्जी लिमिटेडले १६० मेगावाट क्षमताका दुई ठूला जलविद्युत आयोजनामा दुई अर्ब रुपैयाँ स्वपुँजी (इक्विटी) लगानी गर्ने भएको छ।

सिंगटी इनर्जीले ९९ मेगावाटको मोदी लान्द्रुक जलविद्युत आयोजनामा एक अर्ब र ६१ मेगावाटको नारखोला आयोजनामा एक अर्ब रुपैयाँ लगानी गर्ने भएको हो। यी दुई आयोजनालाई लगानी जुटेर निर्माण सुरु भइसकेको छ।

नारखोला आयोजना नारखोला हाइड्रो इनर्जी प्रालि र मोदी लान्द्रुक आयोजना अन्नपूर्ण विद्युत विकास कम्पनीले निर्माण थालेको हो।

कम्पनीले ह्वाविटाट पावर कम्पनी लिमिटेड र अर्विट इनर्जी लिमिटेडमा लगानी गरिसकेको छ। कम्पनीले दोलखामा २५ मेगावाटको सिंगटी जलविद्युत आयोजना सञ्चालन गरिरहेको छ।

सिंगटी इनर्जीको गत सोमबार सम्पन्न १६ औं वार्षिक साधारणसभाले दुई ठूला जलविद्युत अयोजनामा दुई अर्ब रुपैयाँ संस्थापक सेयरमा लगानी गर्ने प्रस्ताव पारित गरेको छ। उक्त रकम कम्पनीले हकप्रद सेयर जारी गरेर जुटाउने भएको छ। एक बराबर एक अनुपातमा हकप्रद सेयर निष्कासन गर्ने प्रस्ताव पनि सभाले पारित गरेको सिंगटी इनर्जीले जानकारी दिएको छ।

गत वर्षको नाफाबाट साढे १४ करोड रुपैयाँ बोनस सेयर वितरणपछि सिंगटी हाइड्रोको चुक्ता पुँजी बढेर तीन अर्ब चार करोड ५० लाख रुपैयाँ पुगेको छ। सतप्रतिशत हकप्रद सेयर जारीपछि कम्पनीको चुक्ता पुँजी दोब्बर भई छ अर्ब नौ करोड रुपैयाँ पुग्ने भएको छ।

६१ मेगावाटको नारखोला जलविद्युत आयोजना बनाउन लगानी जुटेको छ। आयोजनामा कुमारी बैंकको अगुवाईमा नेपाल एसबिआई बैंक, कृषि विकास बैंक, एनआइसी एसिया बैंक र मुक्तिनाथ विकास बैंकले ऋण लगानी गर्ने भएका छन्।

आयोजनाको कुल लागत १२ अर्ब ८४ करोड रुपैयाँ रहेको छ। जसमा बैंकहरुले नौ अर्ब ६३ करोड ऋण र संस्थापकहरुको इक्विटी तीन अर्ब २१ करोड रुपैयाँ रहेको छ।

आयोजनाले आगामी तीन वर्षभित्र विद्युत उत्पादन गरी नेपाल विद्युत प्राधिकरणको राष्ट्रिय प्रसारणमा जोड्ने तयारी गरेको जानाएको छ। मनाङिस्थत नार्पा भुमी र नासोङ गाउँपालिकामा रहेको नार खोला र सोती खोलाको पानीलाई एकीकृत गरी ६१.११ मेगावाटको जलविद्युत आयोजना निर्माण प्रकृया अघि बढाइएको हो। कम्पनीले विद्युत प्राधिकरणसँग विद्युत खरिद सम्झौता (पीपीए) गरिसकेको छ।

आयोजनाको ग्रेस हेड ५८८.८२ मिटर रहनेछ। वार्षिक ३६ करोड ६४ लाख ८ हजार युनिट बिजुली उत्पादन हुने अध्ययनले देखाएको छ। आयोजनाको हेडरेस टनेल ८ किलोमिटर लामो रहेको छ।

आयोजनाको बाँध तथा हेडवक्सका संरचनाहरु नार्पा भुमी गाउँपालिकामा हुने र उक्त बाँधस्थलबाट सुरुङमार्ग हुँदै नासोङ गाउँपालिकामा रहने विद्युत गृहमा नार्पा भुमी र नासोङ गाउँपालिका हुँदै आएको सुरुङमार्गमार्फत पेनस्टक पाईपको प्रयोग गरी विद्युतगृहमा पानी पठाई बिजुली उत्पादन गरिने छ।

आयोजनाबाट उत्पादित विद्युत विद्युत प्राधिकरणको मनाङस्थित निर्माणाधीन धारापानी सवस्टेशनमा जोडिने छ।

यस्तै कम्पनीले ९९ मेगावाटको मोदी लान्द्रुक जलविद्युत आयोजनालाई लगानी जुटेको छ। आयोजनामा माछापुच्छ्रे बैंकको अगुवाइसहित आधा दर्जन बैंकको १२ अर्ब २० करोड रुपैयाँ ऋण लगानी हुने भएको छ।
आयोजनामा ग्लोबल आइएमई बैंक, एभरेष्ट बैंक, नेपाल एसबिआई बैंक, कृषि विकास बैंक र लुम्बिनी विकास बैंकको लगानी हुने भएको छ। आयोजना बनाउन कूल १६ अर्ब ४० करोड रुपैयाँ लागत अनुमान गरिएको छ।

आयोजनामा बैंकहरुले ७५ प्रतिशत र बाँकी २५ प्रतिशत सिंगटी हाइड्रोसहित प्रवर्धक कम्पनीको लगानी हुने भएको छ।

आयोजनाले बिजुली बेचेर वार्षिक तीन अर्ब ३४ करोड रुपैयाँ आम्दानी गर्नेछ।

अन्नपूर्ण विद्युत विकासद्धारा प्रवद्र्धित लान्द्रुक मोदी आयोजना कास्कीको अन्नपूर्ण गाउँपालिकामा पर्दछ। आयोजना विश्वकै तेस्रो ‘हाई हेड प्रोजेक्ट’ र नेपालमा सबैभन्दा धेरै उचाइ भएको आयोजना भएको छ।

उक्त आयोजनाको हेडवक्सदेखि विद्युतगृहसम्मको उचाई १४ सय १८ मिटर रहेको छ। नेपाली जलविद्युत आयोजनाहरुमा यो लेभलको उचाई सबै भन्दा धेरै हो।विद्युत प्राधिकरणसँग पीपीए भैसकेको छ।

आगामी चार वर्षभित्र निर्माण सम्पन्न गर्ने लक्ष्य लिएको कम्पनीले तोकिएको समय भन्दा अगावै विद्युत उत्पादन गर्ने योजना कम्पनीको छ। कम्पनीले आयोजना निर्माणका क्रममा केबलकार पूर्वाधार बनाएको छ।