अब मासिक ८३ हजारसम्म कमाउनेले आयकर तिर्नु नपर्ने

काठमाडौँः अर्थमन्त्री डा. स्वर्णिम वाग्लेले आर्थिक वर्ष २०८३र८४ को बजेटमार्फत व्यक्तिगत आयकर प्रणालीमा महत्वपूर्ण परिवर्तन गर्दै मध्यम वर्ग र साना आय भएका नागरिकलाई राहत दिने घोषणा गरेका छन्। बजेटको बुँदा नम्बर ७ अनुसार कर छुटको सीमा विस्तार गरी कर संरचनामा नयाँ व्यवस्था लागू गरिएको हो।

अर्थमन्त्री वाग्लेले व्यक्तिगत आयकर छुट पाउने सीमा वार्षिक ५ लाख रुपैयाँबाट बढाएर १० लाख रुपैयाँ पुर्‍याएका छन्। यससँगै अब वार्षिक १० लाख रुपैयाँसम्म आम्दानी गर्ने व्यक्तिले आयकर तिर्नु नपर्ने भएको छ।

यो नयाँ व्यवस्थाअनुसार मासिक ८३ हजार ३३३ रुपैयाँसम्म आम्दानी गर्ने नागरिक आयकरको दायराबाहिर पर्नेछन्। सञ्चय कोष, नागरिक लगानी कोष वा सामाजिक सुरक्षा कोषमा हुने योगदानलाई समेत गणनामा समावेश गर्दा मासिक करिब ८४ हजारदेखि ९० हजार रुपैयाँसम्म तलब पाउने व्यक्तिहरू पनि न्यूनतम वा कर छुटको दायरामा पर्न सक्नेछन्।

यसअघि वार्षिक ५ लाख रुपैयाँको सीमा हुँदा मासिक करिब ४२ हजार रुपैयाँभन्दा माथिको आम्दानीमा आयकर लाग्दै आएको थियो।

अर्थमन्त्री वाग्लेले बजेट प्रस्तुत गर्दै भने, “आम नागरिकको कर तिर्ने क्षमता र वर्तमान महँगीलाई ध्यानमा राख्दै व्यक्तिगत आयकर छुटको सीमा दोब्बर गरी १० लाख रुपैयाँ पुर्‍याइएको छ।”

त्यसैगरी सरकारले आयकरको उच्चतम दरमा समेत समायोजन गरेको छ। अधिक आय भएका वर्गका लागि करको दर केही घटाइएकाले समग्र करभार कम हुने र बजारमा नगद प्रवाह तथा उपभोग क्षमता बढ्ने अपेक्षा सरकारको छ।