नेपालमा सार्वजनिक भयो म्याक्सस ईटेरोन, पहिलो ५० ग्राहकले ८८ लाखमै किन्न पाउने

काठमाडौँ: नेपालमा म्याक्सस सवारीसाधनको आधिकारिक बिक्रेता हिमालय मोट्रोक्स प्रालिले नयाँ विद्युतीय पिकअप म्याक्सस ईटेरोन ९ कम्फोर्ट सार्वजनिक गरेको छ। कम्पनीले यो मोडल पहिलो ५० जना ग्राहकका लागि परिचयात्मक मूल्य ८८ लाख रुपैयाँमा उपलब्ध गराउने जनाएको छ।

कम्पनीका अनुसार ईटेरोन ९ कम्फोर्ट दैनिक प्रयोगदेखि लामो दूरीको यात्रा, अफ–रोड साहसिक यात्रा तथा व्यावसायिक प्रयोजनलाई लक्षित गरी विकास गरिएको प्रिमियम फोर–ह्वील ड्राइभ (४डब्ल्यूडी) विद्युतीय पिकअप हो।

यो पिकअपमा १०२.२ किलोवाट–घण्टा (केडब्ल्यूएच) क्षमताको ब्याट्री जडान गरिएको छ, जसले एनईडीसी मापदण्डअनुसार एक पटकको पूर्ण चार्जमा ५६० किलोमिटरसम्म यात्रा गर्न सक्ने कम्पनीको दाबी छ। साथै, ११५ किलोवाट डीसी फास्ट चार्जिङ सपोर्ट भएकाले ब्याट्रीलाई २० प्रतिशतबाट ८० प्रतिशतसम्म करिब ४२ मिनेटमै चार्ज गर्न सकिन्छ।

ईटेरोन ९ कम्फोर्टमा अगाडि १२५ किलोवाट र पछाडि २०० किलोवाट क्षमताका दुईवटा विद्युतीय मोटर रहेका छन्। यी मोटरबाट ७०० न्यूटन–मिटर टर्क उत्पादन हुने कम्पनीले जनाएको छ। गाडीले शून्यदेखि १०० किलोमिटर प्रतिघण्टा गति ५.८ सेकेन्डमा लिन सक्ने तथा अधिकतम १९० किलोमिटर प्रतिघण्टा गति हासिल गर्न सक्ने बताइएको छ।

लोड बोक्ने क्षमतातर्फ यो पिकअपले १,०५० किलोग्राम पेलोड र ३,५०० किलोग्रामसम्म ब्रेक्ड टोइङ क्षमता प्रदान गर्छ। यसको कार्गो बेडको आकार १,५६१ × १,५०० × ५३५ मिलिमिटर रहेको छ।

गाडीमा अल–टेरेन सिस्टम (एटीएस) उपलब्ध छ, जसले विभिन्न सडक तथा अफ–रोड अवस्थाहरूमा सहज ड्राइभिङ अनुभव दिने कम्पनीको भनाइ छ। यसमा ५४५ मिलिमिटरसम्म पानी पार गर्ने क्षमता, २९ डिग्री अप्रोच एङ्गल र २५ डिग्री डिपार्चर एङ्गल रहेको छ।

म्याक्सस ईटेरोन ९ कम्फोर्टमा १२.३ इन्चको डिजिटल इन्स्ट्रुमेन्ट क्लस्टर र १२.३ इन्चको टचस्क्रिन इन्फोटेनमेन्ट सिस्टम दिइएको छ।

यसका प्रमुख सुविधामा एप्पल कारप्ले, एन्ड्रोइड अटो, अटोमेटिक एअर कन्डिसनिङ, विद्युतीय रूपमा समायोजन हुने चालक सिट, युएसबी र टाइप–सी चार्जिङ पोर्ट, प्यासिभ इन्ट्री, पुस बटन स्टार्ट, अटोमेटिक हेडलाइट्स, अटोमेटिक वाइपर्स, भेहिकल–टु–लोड (भीटुओएल) सुविधा तथा वन–टच पावर विन्डोज लगायत रहेका छन्।

यो विद्युतीय पिकअपले युरो एनक्यापको पाँच तारे सुरक्षा मूल्यांकन प्राप्त गरेको कम्पनीले जनाएको छ।

सुरक्षातर्फ इलेक्ट्रोनिक स्टेबिलिटी प्रोग्राम (ईएसपी), इलेक्ट्रोनिक ब्रेक असिस्ट, हिल स्टार्ट असिस्ट, हिल डिसेन्ट कन्ट्रोल, टायर प्रेसर मनिटरिङ सिस्टम (टीपीएमएस), रिभर्स क्यामेरा, अगाडि र पछाडिका पार्किङ सेन्सर, क्रुज कन्ट्रोल, इलेक्ट्रोनिक पार्किङ ब्रेक विथ अटो होल्ड तथा चालक र अगाडिको यात्रुका लागि एयरब्याग उपलब्ध छन्।

हिमालय मोट्रोक्सले ईटेरोन ९ कम्फोर्टमा ८ वर्ष वा २ लाख किलोमिटरसम्मको ब्याट्री वारेन्टी तथा ५ वर्ष वा १.६ लाख किलोमिटरसम्मको गाडी वारेन्टी उपलब्ध गराउने जनाएको छ।

कम्पनीका अनुसार ८८ लाख रुपैयाँको परिचयात्मक मूल्य पहिलो ५० जना ग्राहकका लागि मात्र लागू हुनेछ। त्यसपछि गाडीको मूल्य पुनः परिमार्जन हुन सक्ने जनाएको छ।