भदौदेखि नयाँ बजार व्यवस्थामाथि छलफल हुने, सेबोनले नियमावली तयार गर्दै

काठमाडौँः नेपाल धितोपत्र बोर्ड (सेबोन) ले पूँजीबजारलाई परम्परागत कारोबार प्रणालीबाट थप विकसित बजारतर्फ लैजाने तयारी तीव्र बनाएको छ। बोर्डले आईपीओ वितरण प्रणालीदेखि इन्ट्राडे ट्रेडिङ, मार्जिन लेन्डिङ र सर्ट सेलिङसम्मका विषयलाई समेट्ने नयाँ नियामकीय संरचना तयार गर्ने प्रक्रिया अघि बढाएको हो।

बोर्डका अनुसार यी विषयसँग सम्बन्धित नियम, निर्देशिका तथा परामर्शपत्र साउनभित्र तयार गरिने लक्ष्य राखिएको छ। त्यसपछि भदौ महिनादेखि लगानीकर्ता, ब्रोकर, मर्चेन्ट बैंकर, सूचीकृत कम्पनी तथा अन्य सरोकारवालासँग औपचारिक छलफल सुरु गरिनेछ। प्राप्त सुझावका आधारमा आवश्यक संशोधन गर्दै नयाँ व्यवस्था लागू गरिने योजना छ।

यदि प्रस्तावित सुधार कार्यान्वयनमा गए, नेपाली पूँजीबजारमा पहिलो पटक इन्ट्राडे ट्रेडिङ र सर्ट सेलिङजस्ता आधुनिक कारोबार प्रणालीको कानुनी आधार तयार हुनेछ। यससँगै मार्जिन लेन्डिङलाई पनि स्पष्ट र प्रभावकारी बनाउने तयारी गरिएको छ भने आईपीओ वितरण प्रक्रियालाई थप पारदर्शी र व्यवस्थित बनाउने लक्ष्य राखिएको छ।

सेबोनले यी सुधारलाई चालु आर्थिक वर्षको नीति तथा कार्यक्रमसँग जोडेर अघि बढाएको जनाएको छ। बोर्डले यसअघि तयार पारेको क्यापिटल मार्केट डेभलपमेन्ट ब्लुप्रिन्ट कार्यान्वयनमा रहेको र त्यसकै आधारमा पूँजीबजार सुधारका थप चरण अघि बढाइएको बताएको छ।

अर्थमन्त्री डा. स्वर्णिम वाग्लेले पनि बोर्डलाई नियामकीय क्षमता सुदृढ गर्दै दीर्घकालीन सोचका साथ बजार विकास गर्न आग्रह गरेका छन्। उनले लगानीकर्ताको संख्या र डिम्याट खाताको विस्तारसँगै नियामक निकायको दक्षता र संस्थागत क्षमता पनि सोही अनुपातमा बढ्नुपर्ने धारणा राखेका छन्।

उनले पूँजीबजारसम्बन्धी नीति निर्माण गर्दा आर्थिक पक्षसँगै राजनीतिक–आर्थिक प्रभावको समेत अध्ययन गरी पर्याप्त छलफलपछि मात्रै कार्यान्वयनमा लैजानुपर्ने सुझाव दिएका छन्। साथै आवश्यक कानुनी तथा नीतिगत सुधारमा सरकारले सहजीकरण गर्ने प्रतिबद्धता पनि दोहोर्‍याएका छन्।

अब सरोकारवालाबाट प्राप्त सुझावपछि अन्तिम रूप दिइने यी नियमहरू लागू भएमा नेपालको पूँजीबजार थप आधुनिक, प्रतिस्पर्धी र अन्तर्राष्ट्रिय अभ्यासअनुकूल बन्ने अपेक्षा गरिएको छ।