बुकबिल्डिङबाट आईपीओ ल्याउन लागेको नर्भिक हस्पिटलले सेयरधनीलाई ४२.१० प्रतिशत लाभांश दिने

काठमाडौं। व्यवसायिक घरना बीएलसी ग्लोबल होल्डिङ्सले सञ्चालन गरिरहेको नर्भिक इन्टरनेसनल हस्पिटल एन्ड मेडिकल कलेज लिमिटेडले सेयरधनीहरुलाई आकर्षक लाभांश घोषणा गरेको छ।

नर्भिकले गत आर्थिक वर्ष ०८२/०८३ मा गरेको नाफाबाट सेयरधनीलाई ४२.१० प्रतिशत लाभांश दिने भएको हो। जसअनुसार २२.१० प्रतिशत नगद र बाँकी २० प्रतिशत बोनस सेयर दिने नर्भिकले जनाएको छ।

यही मंगलबार बसेको सञ्चालक समिति बैठकले उक्त लाभांश प्रस्ताव गरेको हो। लाभांश पारित गर्त हस्पिटलले आउँदो भदौ १५ मा वार्षिक साधारणसभा बोलाएको छ। साधारणसभाबाट पारित भएपछि हस्पिटलले लाभांश वितरण गर्नेछ। नर्भिकले वर्षेनी सेयरधनीहरुलाई ४२ प्रतिशत हारहारीमा लाभांश दिँदै आएको छ।

बोनस सेयरबाट हुन आउने चुक्ता पुँजीको २० प्रतिशत अर्थात २५ लाख कित्ता बुकबिल्डिङ विधिबाट प्राथमिक सेयर (आईपीओ) निष्कासनको तयारी हस्पिटलले गरेको छ।

नर्भिकको क्षमता विस्तारमा सवा ३ अर्ब लगानी: माघदेखि २७५ शय्या सञ्चालनमा, आईपीओको तयारी

बुकबिल्डिङ सेयर मूल्य तय भएको छैन्। सभाले संस्थागत लगानीकर्तालाई वितरण गर्ने विवरणपत्र स्वीकृत गर्ने प्रस्ताव पारित गर्ने हस्पिटलले जनाएको छ।

आईपीओ निष्काशन गर्न सन् २०२१ मा नर्भिक पब्लिक लिमिटेडमा रुपान्तरण भएको हो। नर्भिकले धितोपत्र निष्काशन तथा बिक्री प्रवन्धकमा एलएस क्यापिटल लिमिटेडलाई नियुक्त गरेको छ।

अस्पतालले ३ अर्ब ३२ करोड रुपैयाँको थप लगानीमा मल्टिस्पेसियालिटी सुविधासहितको नयाँ पूर्वाधार निर्माण कार्य अन्तिम चरणमा पुर्याएको छ। आगामी माघसम्म सञ्चालनमा ल्याउने तयारी भएको नर्भिकले जनाएको छ।

२०२३ देखि सेवा विस्तार गर्न नयाँ भवन निर्माण निर्माण सुरु भएको हो। हाल ११६ शैय्या सञ्चालनमा रहेकोमा क्षमता बढेपछि २७५ पुग्नेछ। १५९ बेड थप्न लागेको अस्पतालले जनाएको छ।

यस क्रममा सिभिल निर्माण कार्य अन्तिम चरणमा पुगेको छ भने चिकित्सा उपकरण खरिद प्रक्रिया सन्तोषजनक रूपमा अघि बढिरहेको छ।

नर्भिकले अहिलेको पार्किङ स्थल क्षेत्रमा अत्याधुनिक सेवा र सुविधासम्पन्न आठ तले भवन निर्माण गरिरहेको छ।

अस्पतालले भवन रोशन कन्स्ट्रक्सनले बनाइरहेको छ। नयाँ भवन ‘कम्प्रिहेन्सिभ क्यान्सर ट्रिटमेन्ट’ सहितको आधुनिक र सुविधासम्पन्न हुनेछ। कूल एक लाख ६५ हजार वर्गफिटमा आधुनिक भवन बनेको छ।

नर्भिकले चालू आर्थिक वर्षको नौ महिनामा दुई अर्ब चार करोड ४० लाख रुपैयाँ आम्दानी गरेको छ। गत वर्ष सन् २०२५मा अस्पतालले दुई अर्ब २६ करोड ३० लाख सार्वजनिक गरिएको वित्तीय विवरणमा उल्लेख छ।

सन् १९९३ मा उद्योगपति वसन्तकुमार चौधरीले ३० बेडसहितको नर्भिक हेल्थकेयर एन्ड रिसर्च सेन्टरबाट स्वास्थ्य सेवा सुरु गरेका थिए।