डिभाइन हेल्थकेयरले २० लाख ७० हजार कित्ता आइपीओ निष्कासन गर्ने

काठमाडौँः औषधि उत्पादक कम्पनी डिभाइन हेल्थकेयर लिमिटेडले सर्वसाधारणका लागि प्रारम्भिक सार्वजनिक निष्कासन (आइपीओ) जारी गर्ने प्रक्रिया अघि बढाएको छ। कम्पनीले आइपीओ निष्कासनका लागि मुक्तिनाथ क्यापिटल लिमिटेडलाई बिक्री प्रबन्धक नियुक्त गरेको छ।

यससम्बन्धी सम्झौतामा डिभाइन हेल्थकेयरका अध्यक्ष युवराज श्रेष्ठ र मुक्तिनाथ क्यापिटलका प्रमुख कार्यकारी अधिकृत कविन्द्रविक्रम ध्वज जोशीले हस्ताक्षर गरेका छन्।

कम्पनीले जारी पुँजीको २० प्रतिशतबराबर २० लाख ७० हजार कित्ता साधारण सेयर सर्वसाधारणलाई निष्कासन गर्ने तयारी गरेको जनाएको छ। सम्झौता कार्यक्रममा कम्पनीका प्रबन्ध सञ्चालक सुशान्त मुरारका तथा सञ्चालक मनोज केसी र विनय तोदीलगायतको उपस्थिति रहेको थियो।

वि।सं। २०७४ सालमा स्थापित डिभाइन हेल्थकेयर चितवनको भरतपुर महानगरपालिका–१६, विजय नगरमा रहेको औषधि उत्पादक कम्पनी हो। कम्पनीले औषधि व्यवस्था विभागबाट उत्पादन तथा बजारीकरणसम्बन्धी आवश्यक दर्ता तथा स्वीकृति प्राप्त गरी मानव स्वास्थ्यसम्बन्धी औषधि उत्पादन तथा बिक्री–वितरण गर्दै आएको जनाएको छ।

हाल कम्पनीले ६७ प्रकारका औषधि उत्पादन गरी नेपाली बजारमा बिक्री–वितरण गर्दै आएको छ। कम्पनीका अनुसार एसिडेक्स, नेक्सोफास्ट ५ र प्रेगिक्स रेन्जलगायतका औषधि बजारमा उल्लेख्य मात्रामा बिक्री भइरहेका छन्।

कम्पनीले आगामी माघदेखि सिओपिडी अर्थात् दीर्घकालीन अवरोधात्मक फोक्सो रोगका बिरामीका लागि आवश्यक ड्राई पाउडर इनहेलर उत्पादनसमेत सुरु गर्ने तयारी गरेको जनाएको छ।

करिब एक बिघा क्षेत्रफलमा फैलिएको कम्पनी विगत तीन आर्थिक वर्षदेखि नाफामा सञ्चालन हुँदै आएको र हालसम्म बैंक तथा वित्तीय संस्थाबाट ऋण नलिई मुख्यतः स्वपुँजीबाट सञ्चालन भइरहेको कम्पनीले जनाएको छ। कम्पनीको देशभर १२५ भन्दा बढी वितरकको सञ्जाल रहेको छ।

आइपीओबाट प्राप्त हुने पुँजी नयाँ प्रविधि विस्तार, नयाँ औषधिको विकास, विद्यमान उत्पादनको गुणस्तर सुधार तथा रिसर्च एन्ड डेभलपमेन्टमा प्रयोग गर्ने कम्पनीले जनाएको छ। कम्पनीले उत्पादन प्रक्रियालाई थप प्रभावकारी, सुरक्षित तथा गुणस्तरीय बनाउने लक्ष्यसमेत राखेको छ।