जिल्ला निर्वाचन कार्यालय खारेजी हुँदैनः अर्थमन्त्री

काठमाडौं– अर्थमन्त्री डा प्रकाशशरण महतले जिल्ला निर्वाचन कार्यालय खारेज नहुने बताएका छन्। आगामी आर्थिक वर्षको बजेट मार्फत निर्वाचन कार्यालय खारेज गर्ने सरकारी घोषणाले निर्वाचनको निष्पक्षतामा प्रश्न उठेको भन्दै नेकपा एमाले र राष्ट्रिय स्वतन्त्र पार्टीका सांसद्हरुले मंगलबार प्रतिनिधिसभाको बैठकमा अवरोध गरेपछि अर्थमन्त्री महतले जवाफमा यस्तो बताएका हुन्।

उनले जिल्ला निर्वाचन कार्यालयको स्वतन्त्र अस्तित्वका लागि आफु पूर्ण प्रतिवद्ध रहेको बताउँदै शंका नगर्न सांसदहरुलाई आग्रह गरे। बजेटमा जिल्ला निर्वाचन कार्यालय खारेजी गर्न भन्ने शब्द भुलवस परेको उनको भनाइ थियो।

‘जिल्ला निर्वाचन आयोग नै खारेजी भन्ने पक्षमा हामी थिएनौं। तर, त्यहाँ खारेजी भन्ने शब्द पर्न गयो,’ उनले भने, ‘जिल्ला निर्वाचन कार्यालयहरु पहिले जसरी रहेका थिए। त्यसरी नै रहने छन्। अझै त्यसलाई सवल बनाउने हो। त्यसकारण यसको स्वतन्त्र अस्तित्वमा बाधा आउँदैन।’