‘कथा डबली’ को पहिलो सिरिजमा इन्द्रजात्राको मिथक

काठमाडौँ: सहरका पुराना मिथक, कथा, किंवदन्ती सुन्ने र भावी पुस्ताका लागि डिजिटल–अर्काइभ गर्ने उद्देश्यले नेपाल प्रज्ञा प्रतिष्ठानले एक विशेष शृंखला ‘कथा डबली’ सुरुवात गर्ने भएको छ।

‘कथा डबली–१’ शृंखलाअन्तर्गत काठमाडौँको ऐतिहासिक तथा सांस्कृतिक पर्व ‘इन्द्रजात्रा’ को मिथक र किंवदन्ती सुन्ने यो कार्यक्रम २०८३ असोज ८ गते बिहीबार दिउँसो २ बजे कमलादीस्थित प्रज्ञा प्रतिष्ठानको डबलीमा आयोजना हुनेछ।

कार्यक्रमको मुख्य आकर्षणका रूपमा नेपालभाषा एकेडेमीका चान्सलर तथा वरिष्ठ संस्कृतिविद् मल्ल के. सुन्दरको कथा वाचन रहनेछ। मल्लले इन्द्रजात्रासँग जोडिएका शताब्दीऔँ पुराना कथा, मिथक र किंवदन्ती, काठमाडौं सहरको उत्पत्ति अनि यसको सांस्कृतिक वैभवमाथि लिखित रोचक कथा वाचन गर्नेछन्।

सांस्कृतिक स्मृति थप जीवन्त बनाउन ‘इन्द्रजात्रा: शारदीय पर्व’ कार्यक्रममा परम्परागत नृत्य पनि प्रस्तुत गरिनेछ। सो अवसरमा कलाकारले उपत्यकाको प्रसिद्ध ‘लाखे प्याखं’ (लाखे नाच) र ‘कुमारी नृत्य’ पनि मञ्चन गर्ने नेपाल प्रज्ञा प्रतिष्ठानका काव्य, संस्कृति तथा डिजिटलाइजेसन विभाग प्रमुख दीपक सापकोटाले बताए। ‘सहर–गाउँका लोपोन्मुख मौखिक इतिहास, लोककथा र सांस्कृतिक सम्पदा जीवन्त राख्न अनि प्रविधि प्रयोग गरी तिनलाई सुरक्षित अर्काइभ गर्न यो शृंखला सञ्चालन गरिएको हो’, उनले भने।

सांस्कृतिक कथा सुन्ने, अर्काइभ गर्ने शृंखला ‘कथा डबली’ नेपालका विभिन्न सहर, गाउँमा निरन्तर आयोजना हुने प्रतिष्ठानको ‘काव्य, संस्कृति तथा डिजिटलाइजेसन विभाग’ ले जनाएको छ।