२२ करोड घाटाबाट १० करोड नाफामा फर्कियो सिटिजन्स बैंक, खराब कर्जा कति?

काठमाडौँः सिटिजन्स बैंक इन्टरनेसनल लिमिटेड चालु आर्थिक वर्ष २०८३/८४ को पहिलो त्रैमासमा घाटाबाट नाफामा फर्किएको छ। बैंकले सार्वजनिक गरेको अपरिष्कृत वित्तीय विवरणअनुसार असोज मसान्तसम्म १० करोड ७७ लाख रुपैयाँ खुद नाफा आर्जन गरेको छ।

गत आर्थिक वर्षको सोही अवधिमा बैंकले २२ करोड ४ लाख रुपैयाँ घाटा व्यहोरेको थियो। यसअनुसार बैंकको वित्तीय नतिजामा एक वर्षको अवधिमा ३२ करोड ८१ लाख रुपैयाँको सुधार आएको छ।

बैंकको नाफामा सुधार आउनुको मुख्य कारण कर्जा नोक्सानी व्यवस्थापन खर्चमा आएको कमी र सञ्चालन खर्च नियन्त्रणमा रहनु हो। समीक्षा अवधिमा बैंकले कर्जा नोक्सानी व्यवस्थापनका लागि १ अर्ब ७ करोड ८५ लाख रुपैयाँ छुट्याएको छ। अघिल्लो वर्ष यस्तो रकम १ अर्ब ७३ करोड ७५ लाख रुपैयाँ थियो। यसरी प्रोभिजन खर्च ३७.९३ प्रतिशतले घटेको छ।

बैंकको निक्षेप संकलन १२.७८ प्रतिशतले बढेर २ खर्ब ४२ अर्ब ७३ करोड रुपैयाँ पुगेको छ। त्यस्तै, कर्जा तथा सापटी ४.२१ प्रतिशतले वृद्धि भई १ खर्ब ८३ अर्ब ५० करोड रुपैयाँ कायम भएको छ।

यता, बैंकको खुद ब्याज आम्दानी भने ७.४९ प्रतिशतले घटेर १ अर्ब ५४ करोड १५ लाख रुपैयाँमा सीमित भएको छ। अर्कोतर्फ, खुद शुल्क तथा कमिसन आम्दानी ५.०७ प्रतिशतले बढेर ३६ करोड ८८ लाख रुपैयाँ पुगेको छ।

बैंकको कोषको लागत ४.०५ प्रतिशतबाट घटेर ३.१५ प्रतिशतमा झरेको छ भने आधार दर ५.९० प्रतिशतबाट घटेर ४.८७ प्रतिशत कायम भएको छ। यसले बैंकको ब्याज खर्च घटाउन सहयोग पु¥याएको छ।

नाफामा फर्किएसँगै बैंकको प्रतिसेयर आम्दानी (ईपीएस) पनि ऋणात्मक ५ रुपैयाँ ९७ पैसाबाट सुधार भएर २ रुपैयाँ ६८ पैसा पुगेको छ।

त्यस्तै, बैंकको वितरणयोग्य नोक्सानीसमेत घटेको छ। अघिल्लो वर्ष १ अर्ब १९ करोड २९ लाख रुपैयाँ ऋणात्मक रहेको वितरणयोग्य नाफा चालु आर्थिक वर्षको पहिलो त्रैमासमा ४५ करोड ७७ लाख रुपैयाँ ऋणात्मकमा सीमित भएको छ।

बैंकको खराब कर्जा अनुपात (एनपीएल) भने अघिल्लो वर्षको पहिलो त्रैमासको ६.८४ प्रतिशतबाट सामान्य घटेर ६.८० प्रतिशत कायम भएको छ। बैंकको पुँजी पर्याप्तता अनुपात १२.०८ प्रतिशत रहेको छ।