नेपालमा आउँदै ‘हसल बाई नेपहप’, टीभीएस एनटर्क टाइटल स्पोन्सर

भारतीय चर्चित र्‍याप रियालिटी शो ‘एमटीभी हसल’ को नेपाली संस्करण ‘हसल बाई नेपहप’ नेपालमा सञ्चालन हुने भएको छ। मलिन मिडिया एन्ड इभेन्ट प्रालिले ल्याउन लागेको कार्यक्रमको टाइटल स्पोन्सरमा टीभीएस एनटर्क जोडिएको छ।

‘टीभीएस एनटर्क प्रिजेन्ट्स हसल बाई नेपहप’ नाममा प्रस्तुत हुने कार्यक्रम कान्तिपुर टेलिभिजनबाट प्रसारण हुनेछ।

नेपाली हिप–हप संगीत र नयाँ प्रतिभालाई राष्ट्रिय मञ्च प्रदान गर्ने उद्देश्यले ल्याउन लागिएको कार्यक्रममा प्रतिस्पर्धा, मेन्टरसिप र सांगीतिक प्रस्तुतिलाई प्राथमिकता दिइने आयोजकले जनाएको छ।

कार्यक्रममा स्थापित र्‍यापरसँगै नयाँ पुस्ताका कलाकारले पनि आफ्नो प्रतिभा प्रस्तुत गर्ने अवसर पाउनेछन्। अन्तर्राष्ट्रिय रियालिटी शोको अवधारणामा आधारित भए पनि नेपाली कलाकारका मौलिक कथा, स्थानीय संस्कृति र नेपालको हिप–हप पहिचानलाई केन्द्रमा राखिने आयोजकको भनाइ छ।

‘गल्लीदेखि ग्लोरीसम्म’ भन्ने नारासहित अघि बढ्ने कार्यक्रमको प्रसारण मिति र अन्य विवरण चाँडै सार्वजनिक गरिने जनाइएको छ।