ललितपुर मयेर्स कपमा सुदूरपश्चिम र एपीएफको जित

काठमाडौं- त्रिवि क्रिकेट मैदानमा बिहीबार सुरु भएको ललितपुर मेयर्स महिला टी-२० क्रिकेट प्रतियोगितामा सुदूरपश्चिम प्रदेश र विभागीय टिम एपीएफले जित निकालेका छन्।

प्रतियोगिताअन्तर्गत बिहीबार बिहान भएको खेलमा सुदूरपश्चिमले लुम्बिनीलाई ५१ रनले हराएको हो। टस जितेर पहिले ब्याटिङ गरेको सुदूरपश्चिमले २० ओभर खेल्दै तीन विकेट गुमाएर १३७ रन बनाएको थियो। जवाफमा लुम्बिनीले २० ओभरमा सात विकेट गुमाएर ८६ रन मात्र बनाउन सक्यो।

सुदूरपश्चिमकी सम्झना खड्काले ४५ बलमा ५१ रन बनाइन् भने रुबी पोद्दारले २८ रनको योगदान दिइन्। बलिङतर्फ लुम्बिनी प्रदेशकी कृतिका मरासिनीले दुई विकेट लिएकी थिइन्।

जवाफमा लुम्बीनीका लक्ष्मी चौधरीले २५ रन बनाइन् भने बाँकी खेलाडीले सम्झनलायक प्रदर्शन गरेनन्। सुदूरकी रितु कनौजियाले दुई विकेट लिएको खेलमा ५ खेलाडी भने रनआउट बने।

सोही मैदानमा भएको दोस्रो खेलमा उपाधि दाबेदार एपीएफले मधेशमाथि १० विकेटको जित निकालेको छ। एपीएफले ७५ बल बाँकी रहँदै जित निकालेको हो।

पहिले ब्याटिङ गरेको मधेश ५८ रनमै अलआउट भयो। एपीएफका लागि सोनु खड्काले चार र सिता राना मगरले तीन वकेट गिराएकी थिइन्।

जवाफमा सिताले ज्योति पाण्डेसँग ओपनिङ गर्दै विजयी साझेदारी गरिन्। उनले ३६ बलमा ४५ रन बनाइन्। यससँगै सुदूरपश्चिम र एपीएफले समान २-२ अंक जोडेका छन्।