मौद्रिक नीतिपछि घरजग्गा कारोबार खुकुलो होला?

काठमाडौँ– नेपाल राष्ट्र बैंकले चालू आर्थिक वर्ष २०८०/८१ को मौद्रिक नीति आइतबार (आज) सार्वजनिक गर्ने तयारी गरेको छ। मौद्रिक नीति सार्वजनिक गर्नुअघि पारित गराउनका लागि नेपाल राष्ट्र बैंकले सञ्चालक समिति (बोर्ड)को बैठक सुरु भएको छ।

मौद्रिक नीतिले नीतिगत दर, बैंक दर र निक्षेप संकलन दर घटाउने तयारी गरेको बताइएको छ। यस्तै, अढाइ करोड रुपैयाँभन्दा कम मूल्यका घरजग्गाका कारोबारलाई चलायमान गराउने गरी नीति समेत आउने राष्ट्र बैंक स्रोतको दाबी छ।

सरकारले आर्थिक वृद्धिको लक्ष्य ६ प्रतिशत राखेकाले त्यसलाई भेट्ने गरी कर्जा परिचालन गर्न राष्ट्र बैंकलाई समस्या नहुने बताइएको छ। ६ प्रतिशत आर्थिक वृद्धिको लक्ष्य भेटाउन १२ प्रतिशत कर्जा प्रवाह हुनुपर्ने मान्यता राखिन्छ।

मौद्रिक नीति विषयमा गभर्नर महाप्रसाद अधिकारीले सरोकारवालाहरूसँग छलफल गरेका थिए।

आर्थिक वर्ष सुरु भएको एक सातामा मौद्रिक नीति ल्याउनुपर्ने व्यवस्था छ। गभर्नर महाप्रसाद अधिकारी सम्पत्ति शुद्धीकरणसम्बन्धी फाइनान्सियल एक्सन टाक्स फोर्स (एफएटीएफ) को कार्यक्रममा सहभागी हुनका लागि क्यानडा गएपछि यस पालि मौद्रिक नीति आउनमा केही ढिलाइ भएकाले पहिलो साताको अन्तिम दिन मौद्रिक नीति ल्याउन लागिएको हो।

अधिकारी क्यानडाको भ्यानकुमरमा आयोजित एसिया प्यासिफिक ग्रुप अन मनी लाउन्डरिङ(एपीजी) को वार्षिक प्लेनरी बैठक सहभागी भई साउन ३ गते स्वेदश फर्किएका थिए। एपीजीको बैठकले नेपाललाई सम्पत्ति शुद्धीकरणको ग्रे लिस्टमा नराख्ने निर्णय गरेको छ।

अर्थमन्त्री डा प्रकाशशरण महतले सार्वजनिक रूपमा नै खुलुलो मौद्रिक नीति ल्याउन राष्ट्र बैंकसँग आग्रह गर्दै आएका छन्। मौद्रिक नीति आएपछि अर्थतन्त्रका अधिकांश समस्या हल हुने उनको जिकिर छ। यद्यपि राष्ट्र बैंकले भने मौद्रिक नीतिमा केकस्ता उपकरण अवलम्बन गरिने र त्यसको असरबारे बताइसकेको छैन।

मौद्रिक नीति सार्वजनिक गर्ने तयारीमा राष्ट्र बैंक जुट्दा लघुवित्तबाट पीडितहरूले भने नेपाल राष्ट्र बैंकको केन्द्रीय कार्यालय घेराउ गरेका छन्। शनिबार दिउँसो माइतीघरमा जम्मा भएका उनीहरूले बालुवाटारसम्म मार्च पास गरी राष्ट्र बैंकको कार्यालय घेराउ गरेका हुन्।

बालुवाटारमा भाटभटेनी चोक अगाडि बाटोमा बसेर उनीहरूले प्रदर्शन गरेका थिए।

मौद्रिक नीति आउनुअघि लघुवित्त पीडितले घेरे राष्ट्र बैंक [फोटो फिचर]