सुन तस्करी : होटल भियनामा छापा, पक्राउ पर्नेको संख्या १८ पुग्यो

काठमाडौँ– एक क्विन्टल सुन तस्करी प्रकरणमा राजश्व अनुसन्धान विभागले होटल भियनामा छापा मारेको छ। आइतबार बिहान विभागको टोली पुगेर भियनामा छापा हानेको हो।

सोही होटलबार एक जना बेल्जियमका नागरिकलाई पनि यही घटनामा पक्राउ गरिएको छ। ती व्यक्ति पनि सुन तस्करीमा संलग्न रहेको आशंकामा पक्राउ परेका हुन्। उनीसँग सोधपुछ गर्ने काम भइरहेको विभागले बताएको छ।

साउन २ गते त्रिभुवन अन्तर्राष्ट्रिय विमानस्थलको भन्सार पास गरेर बाहिर जान ठिक्क परेको ब्रेकसुमा एक क्विन्टल हुन भएको हुन सक्ने आशंका गरिएको छ।

यो प्रकरणमा ब्रेकसुसहितको सुन भित्र्याउने रेडी ट्रेडर्सका सञ्चालक दिलिप भुजेलसहितका १८ जना पक्राउ परेका छन्। तर भुजेल यो प्रकरणमा प्रयोग मात्र भएको विभागको अनुसन्धानले देखाएको छ। हालसम्म पक्राउ पर्नेमा दुई जना चिनियाँ नागरिक पनि छन्।

साउन २ गते बरामद भएको ब्रेकसुसहितको तौल १५५ केजी भएको नेपाल राष्ट्र बैंक टक्सार महाशाखाले मापन गरेको छ। यद्यपि त्यसमा कति परिणाममा सुन छ भन्ने कुरा नेपाल राष्ट्र बैंक र सरकारका कुनै पनि अंगले सार्वजनिक गरेका छैनन्।