‘प्रहरी हिरासत’मै विष सेवन गरेका मिटरब्याज पीडित विनितको मृत्यु

विराटनगर- मिटरब्याजबाट पीडित भएर विष सेवन गरेका युवकको मृत्यु भएको छ। आफूले साहुसँग ७ लाख लिएको तर साहुले १५ लाख रुपैयाँ दिएको भन्दै सबै रकम चुक्ता गर्न दबाब दिएको भन्दै उनले मिटरब्याजको आरोपमा जिल्ला प्रशासन कार्यालयमा उजुरी दिएका थिए।

साउन ७ गते यो विषयमा दुवै पक्षबीच जिल्ला प्रशासन कार्यालय मोरङमा छलफल भएको थियो। छलफलले कुनै निष्कर्ष निकाल्न सकेको थिएन। छलफल सकेर बाहिरिने क्रममा प्रहरीले पीडितलाई पक्राउ गरेको थियो। कार्यालय परिसरमै रहेको अवस्थामा उनले विष सेवन गरेका थिए। उनै पीडित कटहरी गाउँपालिका-३ का अन्दाजी ३२ वर्षीय विनित सोनारको बुधबार बिहान मृत्यु भएको हो।

सोनारले विराटनगर महानगरपालिका-७ स्थित आर के चिल्ड्रेन अस्पताल अगाडि चिया-नास्ता पसल सञ्चालन गर्दै आएका थिए। पसल चलाउने क्रममा सोनारले डा नितेश तिवारीसँग ४ वर्षअघि ७ लाख ऋण लिएको मृतककी श्रीमती रीताको भनाइ छ। ७ लाख ऋण लिएपनि १५ लाख तिरेको दाबी सोनारकी श्रीमतीको छ। डा नितेशले अझै १२ लाख तिर्न बाँकी भएको भन्दै रकम फिर्ता गर्न दबाब दिएपछि उनले मिटरब्याजमा उजुरी दिएकी थिइन्।

यस विषयमा छलफल गर्न जिल्ला प्रशासन कार्यालयले दुवै पक्षलाई बोलाएको थियो। तर सोनारले लगेको रकम नपाएको भन्दै प्रदीप भुजेल र विनोद ढकालले जाहेरी दिएका थिए। भुजेलले २ लाख रुपैयाँ र ढकालले ६ लाख रकम नपाएको जाहेरी दिए। ती दुई वटै जाहेरीका आधारमा प्रहरीले पक्राउ गरेको थियो। विनितले विष सेवन गरेपछि उनीसँग थप छलफल हुन पाएको थिएन।

विष सेवनबाट गम्भीर बिरामी भएका उनलाई कोशी अस्पताल हुँदै नोबेल मेडिकल कलेज लगिएको थियो । नोबेलमा उपचारका क्रममा आज बिहान मृत्यु भएको जिल्ला प्रहरी कार्यालय मोरङले बताएको छ।

सहायक प्रमुख जिल्ला अधिकारी प्रदीप साहका अनुसार लेनदेन गरेको प्रमाण दुवै पक्षसँग छैन। ऋण लिँदा ग्यारेन्टीका लागि भन्दै सोनारले डाक्टर नितेशलाई खाली चेक दिएका थिए। त्यसमा मनलाग्दी रकम भरेर आफूलाई फसाएको सोनारको दाबी थियो।