काठमाडौं विमानस्थल भन्सारका कर्मचारी आन्दोलनमा, सोमबार र मंगलबार कार्गो जाँचपास बन्द!

काठमाडौं- त्रिभुवन अन्तर्राष्ट्रिय भन्सार कार्यालयका कर्मचारीहरू आन्दोलित भएका छन्। उनीहरूले आइतबारदेखि आन्दोलनका कार्यक्रम सुरू गरेका हुन्।

राजश्व अनुसन्धान विभागले ६० किलो सुन बरामद गरेपछि आफूहरूलाई विभिन्न कारणबाट हस्तक्षेप गरिएको भन्दै भन्सारका कर्मचारी आन्दोलित भएका हुन्।

उनीहरूले विभिन्न पाँच बुँदे माग राखेका छन्। कर्मचारीहरूले अनुसन्धानको नाममा निर्दोष कर्मचारीहरूलाई धरपकड गर्ने, पक्राउ गरी हिरासतमा लिने लगायतका कार्य बन्द हुनुपर्ने माग राखेका छन्।

सोमबार र मंगलबार कार्गो जाँचपास बन्द गर्ने उनीहरूको घोषणा छ।

कतिपय कर्मचारीहरुलाई हिरासतमा राखिएको, के कति कारणले गिरफ्तार गरिएको भन्दै उनीहरूले यस्तो काम बन्द गर्न माग गरेका छन्।

कर्मचारीहरूले सोमबारसम्म माग पूरा नभए यात्रु जाँचपास शाखाबाट हुने कार्य प्रभावित हुने चेतावनी दिएका छन्। ‘यसबाट हुन सक्ने क्षति तथा यात्रुलाई पर्न जाने असुविधाका लागि सम्बन्धित पक्ष जिम्मेवार हुनुपर्ने छ,’ कर्मचारीहरूद्वारा जारी विज्ञप्तिमा भनिएको छ।

त्रिभुवन भन्सार कार्यालयले जाँचपास गरेको ६० किलो सुन बरामद भएपछि त्यहाँका कर्मचारीहरू पक्राउ परिरहेका छन्।

शनिबार मात्रै प्रहरीले एक भन्सार अधिकृत र दुई जना नायब सुब्बालाई पक्राउ गरेको थियो।

राजश्व अनुसन्धान विभागले सुन बरामद गरेपछि यसको अनुसन्धान नेपाल प्रहरीको केन्द्रीय अनुसन्धान ब्युरो (सिआइबी)ले गरिरहेको छ।

भन्सारका कर्मचारीले गत भदौ १२ गते नै सरूवा माग्दै प्रमुख भन्सार अधिकृतलाई ध्यानाकर्षण गराएका थिए।