६० किलो सुन तस्करी प्रकरण : अनुसन्धान प्रतिवेदन बुझाउने सीआईबीको तयारी

काठमाडौँ- त्रिभुवन विमानस्थलबाट बाहिरिएको ६० किलो सुनको अनुसन्धान प्रतिवेदन सरकारी वकिल कार्यालयमा बुझाउने तयारी भएको छ। अनुसन्धान गरिरहेको प्रहरीको केन्द्रीय अनुसन्धान ब्युरो (सीआईबी)ले काठमाडौं जिल्ला सरकारी वकिलको कार्यालयमा प्रतिवेदन बुझाउने तयारी गरेको हो।

सकेसम्म मंगलबार नभए बुधबारसम्ममा अनुसन्धान प्रतिवेदन बुझाइने केन्द्रीय प्रहरी प्रवक्ता प्रहरी नायब महानिरीक्षक कुबेर कडायतले बताए।  ‘आजै बुझाउने तयारी हो, नभ्याएको खण्डमा भोलि अनुसन्धान प्रतिवेदन बुझाइन्छ,’ उनले भने।

सुन प्रकरणमा हालसम्म ३१ जना पक्राउ परेका छन्। पक्राउ परेकामध्ये सुन तस्करीका मुख्य नाइके बेल्जियम नागरिक दावा छिरिङ रहेको प्रहरी अनुसन्धानको निष्कर्ष छ।

दावासँग सम्बन्ध जोडिएको भनी ब्युरोले बयान लिइएका पूर्वउपराष्ट्रपति नन्दबहादुर पुनका छोरा दीपेश पुनलाई प्रतिवादी बनाउने-नबनाउनेबारे प्रहरीले स्पष्ट बताएको छैन। उनीसँग ब्युरोले चार घन्टा लामो बयान लिएको थियो।

‘कतिपय थुनामा छन्, कतिलाई कागज गरेर छोडिएको छ, कागज गरेर छोडिएका व्यक्ति सबै प्रतिवादी नहुन सक्छन्,’ कडायतले भने। सुन तस्करी प्रकरणमा अध्यागमन विभागमा तत्कालीन अवस्थामा कार्यरत सहसचिव झलकराम अधिकारी पनि जोडिएका थिए।

राजश्व अनुसन्धान विभागले साउन २ गते राति ब्रेक सुमा लुकाएर ल्याइएको सुन बरामद गरेको थियो। भन्सारबाट जाँचपास भइसकेर सिनामंगल आइपुगेको ब्रेक सुभित्र विभागको टोलीले सुन फेला पारेको थियो।

बरामद गर्दाताका विभागले एक क्विन्टल सुन भएको अनुमान गरेको थियो। तर, तौलिँदा ६० किलो ७१६ ग्राम मात्रै फेला परेको थियो। दावाकै व्यवस्थापनमा यो सुनको व्यवस्थापन भएको प्रहरीको निष्कर्ष छ।

यो सुनमा माओवादीका नेताहरूको भूमिका शंकास्पद रहेको आरोप लागिरहेको थियो। तर, यसबारे प्रहरीले अनुसन्धान अघि बढाएन। पुन र महरालाई दावाका व्यापारिक साझेदार तथा सम्पर्कमा रहेको भन्दै प्रहरीले अनुसन्धानमा तान्यो। तर, सबै कारोबार सम्हालेकी दावा पत्नी अमला रोकालाई भने पक्राउ गरिएको छैन।

सुन प्रकरणको केन्द्र मानिएको ठमेलको भियना होटलकी सञ्चालिका अमला हुन्। उनले माओवादी उपमहासचिव वर्षमान पुनका भाइ प्रनेश पुन मगरको लगानीमा सुन उत्खनन तथा प्रशोधन गर्ने कम्पनी रहेको फेला परेको थियो।

खानी तथा भूगर्भ विभागबाट लाइसेन्स लिएको भियना मल्टी पर्पोज ग्रुपमा दावापत्नीको २ लाख २५ हजार कित्ता सेयर रहेको छ। प्रनेशको ३० लाख बराबरको ३० हजार कित्ता सेयर छ।

इलेक्ट्रोनिक सिगरेट (भेप)मा लुकाएर ल्याइएको ९ किलो सुनको भने अलग्गै अनुसन्धान भइरहेको छ।

त्यसमा पूर्वसभामुख कृष्णबहादुर महराका छोरा राहुल पक्राउ परेका छन्। ‘९ किलो सुनको अनुसन्धान सकिएको छैन, आज प्रतिवेदन बुझाउने भनेको ६० किलो सुनको मात्रै हो,’ कडायतले भने। ९ किलो सुनमा महरा बाबु-छोराको सम्पर्क देखिएको थियो।