सोमबार प्यानल घोषणा गर्दै उमेशलाल

काठमाडौँ– नेपाल उद्योग वाणिज्य महासंघको आसन्न निर्वाचनमा वरिष्ठ उपाध्यक्षका उम्मेदवार उमेशलाल श्रेष्ठले सोमबार आफ्नो प्यानल घोषणा गर्ने तयारी गरेका छन्। दिउँसो ३ बजे हेरिटेज गार्डेन सानेपामा एक कार्यक्रममार्फत् प्यानल घोषणा गर्ने तयारी गरिएको प्यानलमा परेका एक व्यवसायीले बताए।

उमेशलाल प्यानलबाट जिल्ला/नगर उपाध्यक्षका लागि दिनेश श्रेष्ठ उम्मेदवार बन्ने भएका छन्। यस्तै वस्तुगत उपाध्यक्षमा हेमराज ढकालले प्रतिस्पर्धा गर्नेछन्। एसोसिएट्स उपाध्यक्षका लागि भरत आचार्यले प्रतिस्पर्धा गर्ने तयारी गरेका छन्। सोमबार पदाधिकारीका उम्मेदवारको मात्र प्यानल सार्वजनिक गर्ने उमेशलालको तयारी छ।

हाल जिल्ला तथा नगर, वस्तुगत र एसोएिट्स सबै समूहको सदस्यमा प्रतिस्पर्धा गर्ने व्यक्तिसमेत टुङ्गो लगाइसकेको सो समूहले मनोनयन दर्तापछि मात्रै सदस्य टिम घोषणा गर्ने भएको छ।

महासंघको विधान अनुसार जिल्ला नगरबाट ३३ जना, एसोसिएट्सबाट १९ र वस्तुगतबाट १४ जना सदस्य चुनिनेछन्। ‘हामीले ६० प्रतिशत यसअघि जितेका/उठेका र ४० प्रतिशत नयाँ साथीहरुलाई समावेश गरेर सदस्यहरुको टुङ्गो लगाएका छौं,’ ती व्यवसायीले भने।

‘जिम्मेवार निजी क्षेत्र, समृद्ध अर्थतन्त्र’ भन्ने मूल नाराका साथ प्यानलले उम्मेदवारी दिन लागेको बताइएको छ। व्यावसायिक हकहितलाई मुख्य एजेन्डा बनाएर चुनावमा होमिने र अध्यक्ष चन्द्रप्रसाद ढकालको सारथी भएर काम गर्न वरिष्ठ उपाध्यक्षमा उम्मेदवारी दिएर अघि बढेको उमेशलाल श्रेष्ठले बताएका छन्।

आफ्नो प्यानललाई पूर्वअध्यक्ष चण्डीराज ढकाल, विनोदबहादूर श्रेष्ठ, पूर्ववरिष्ठ उपाध्यक्ष भाष्करराज राजकर्णिकार, पूर्वउपाध्यक्ष किशोर प्रधानको समेतको साथ रहेको दाबी उसले गरेको छ। महासंघका हालका वरिष्ठ उपाध्यक्ष चन्द्र ढकालले समेत आफूलाई समर्थन गर्ने दाबी उमेशलालको छ।