४५ करोडका खसीबोका किन्दैछ काठमाडौँ, गाउँगाउँमा व्यापारी

काठमाडौँ- यस वर्षको दसैंका लागि काठमाडौं उपत्यकामा ४५ करोड बराबरका खसीबोका र भेडाच्याङ्ग्रा भित्रिने भएका छन्।

मासुका रुपमा खपत हुने खसीबोका र भेडाच्याङ्ग्रा घटस्थापना देखि काठमाडौंमा भित्रिने भएका हुन्।

सरकारी स्वामित्वको खाद्य व्यवस्था तथा व्यापार कम्पनी र निजीक्षेत्रका व्यापारीले काठमाडौंमा ४५ करोड रुपैयाँ बराबरका खसीबोका तथा भेडाच्याङ्ग्रा भित्र्याउन लागेका हुन्।

खाद्य व्यवस्था तथा व्यापार कम्पनीले २ हजार खसीबोका र १ हजार भेडाच्याङ्ग्रा खरिद गर्न ८ करोड ३६ लाख रुपैयाँ बजेट छुट्याएको छ।

उक्त बजेटले ३ हजार बराबरका खसीबोका र भेडाच्याङ्ग्रा दसैंका लागि ल्याउन लागिएका कम्पनीका सुचना अधिकारी शर्मिला न्यौपाने सुवेदीले नेपाल क्लिक्ससँग बताइन्।

‘खसीबोका घटस्थापनाको आसपासमा ल्याइसक्ने योजना छ। अहिले कुन ठाउँमा कति खसीबोका र भेडा च्याङ्ग्रा उपलब्ध हुन्छन्? त्यसको मूल्य कस्तो छ भनेर मुल्यांकन भइरहेको छ,’ उनले भनिन्।

उनका अनुसार, पछिल्लो बजार मूल्यभन्दा केही सहुलियत र छुटमा उपभोक्तालाई खसीबोका र च्याङ्ग्रा बिक्री गरिने बताइन्।

‘बजारको चलनचल्तीको रेटभन्दा केही सहुलियतमा खसीबोका बिक्री गर्ने कम्पनीको योजना छ,’ उनले भनिन्।

यसपालीको दसैँमा निजी व्यापारीहरुले ३७ करोड रुपैयाँ हाराहारीका खसीबोका भित्र्याउने प्रारम्भिक योजना रहेको चौंपाया खरिद बिक्री संघका संस्थापक दीपक थापाले बताए।

गत वर्षको दसैंमा पनि व्यापारीहरुले ४० करोड हाराहारीका खसीबोका काठमाडौं ल्याएर बिक्री गरेको उनको भनाइ छ।

‘करिब ३७ करोडका खसीबोका काठमाडौँ भित्रिने अनुमान छ,’ उनले भने।

दसैंका बेला अन्य समयको तुलनामा बढी खसीबोकाको माग हुने गरेको छ। ३० देखि ३२ हजार गोटा खसीबोका यसपालीको दसैंमा भित्रिने अनुमान छ।

खाद्य कम्पनीले थापाथलीस्थित आफ्नै गोदामबाट खसीबोकाको बिक्री गर्नेछ। निजी क्षेत्रका व्यापारीहरुले काठमाडौंका विभिन्न स्थानबाट बिक्री गर्नेछन्।

भन्सार चेक, स्वास्थ्य प्रमाणपत्र बनाउनुपर्ने झन्झट, विभिन्न प्रक्रियागत लफडाका कारण खसीबोकाको लागत मूल्य बढ्न जाने हुँदा व्यापारीले पहिलो प्राथमिकता स्वदेशी खसीबोका खरिदमै केन्द्रीत भएको थापाले जानकारी दिए।

यदि, स्वदेशी खसीबोका अपुग भयो भने मात्र ‘इन्डियन’ खसीबोका पनि भित्रिन सक्ने उनको भनाइ छ।

पछिल्लो समय उपभोक्तामा मासु खाने ‘कल्चर’ ह्वात्तै बढेको उनको अनुभव छ।

व्यापारीहरु खसीबोका खरिदका लागि अहिले कैलाली, बैतडी, सल्यान, डोटी, इलामलगायतका दूरका जिल्लामा समेत पुगेका छन्। भेडाच्याङ्ग्रा खरिद गर्न मनाङ, मुस्ताङसम्म नै पुगेको व्यापारीहरुले बताएका छन्।

काठमाडौँ उपत्यकामा भित्रिने खसीबोकाको नागढुंगामा स्वास्थ्य परीक्षण गरिनेछ। त्यसका लागि होल्डिङ बोर्ड राखेर स्वस्थ पशुचौपायाँ मात्र भित्र्याउन दिने सरकारको तयारी छ।