टेरामोक्समाथि समितिमा छलफल, सात दिनभित्र आवश्यक कागजात बुझाउन निर्देशन

काठमाडौं- ‘टेलिकम्युनिकेसन ट्राफिक मनिटरिङ एन्ड फ्रड कन्ट्रोल सिस्टम’ (टेरामोक्स) जडानसम्वन्धी विवाद संसदमा लेखा समितिमा प्रवेश गरेको छ ।

लामो समयदेखि नेपाल दुरसञ्चार प्राधिकरणले टेरामोक्स प्रविधि खरिद गरिसके पनि जडान नभएको र खरिद प्रक्रियामा अनियमितताको आशंका पैदा भएपछि लेखा समितिमा उक्त विषयले प्रवेश पाएको हो ।

यसैबीच शुक्रबार पनि सार्वजनिक लेखा समितिको बैठकमा यो विषयमा छलफल भयो । जसमा समितिले टेरामोक्स खरिदसम्वन्धी आवश्यक सबै कागजात सात दिन भित्र बुझाउन नेपाल दूरसञ्चार प्राधिकरणलाई निर्देशन दिएको छ ।

‘टेरामक्स प्रविधि खरिद प्रक्रियाका सम्बन्धमा विस्तृत अध्ययन गर्नुपर्ने भएकाले यो प्रविधि खरिद प्रक्रियाको प्रारम्भदेखि अहिलेसम्मका कागज एवं निर्णयको गतिविधि सात दिनभित्र समितिमा बुझाउन दूरसञ्चार प्राधिकरणलाई निर्देशन छ,’ समितिले निर्देशन दिएको छ ।

समितिले नेपालमा रहेका दूरसञ्चार सेवा प्रदायकबाट राज्यलाई बुझाउन बाँकी कुनै पनि राजस्व तीन महिनाभित्र असुल गर्न समेत निर्देशन दिएको छ ।

खासगरी, सञ्चार तथा सूचना प्रविधि मन्त्रालय, प्राधिकरण र सम्बन्धित निकायमातहतका सेवा प्रदायहरुले समयसीमाभित्र राजश्व नबुझाउने सेवा प्रदायकलाई कानुनबमोजिम कारबाही गरी त्यसको जानकारी समितिलाई गराउन पनि समितिले निर्देशन दिएको छ ।