सेयर बजारमा तेस्रो पटक ‘सर्किट ब्रेक’, १११ अंकले बढेर बन्द भयो नेप्से

काठमाडौँ- आइतबार सेयर बजारमा तीन पटक ‘सर्किट ब्रेक’ लागेर कारोबार बन्द भएको छ।

कारोबार खुलेको ५ मिनेटमै ४ प्रतिशतले बजार बढेपछि पहिलो सर्किट ब्रेक लागेको थियो। यसपछि ११ः २५ मा दोस्रो पटक खुलेको बजारमा २ मिनेटमै ५ प्रतिशत बढेपछि फेरि सर्किट ब्रेक लागेर ४० मिनेटका लागि कारोबार स्थगित भयो।

दिउँसो १२: ५ मा पुन खुलेको सेयर बजारमा १२:०७ मा तेस्रो पटक सर्किट ब्रेक लाग्यो। अघिल्लो दिनको तुलनामा ६ प्रतिशत बढेपछि तेस्रो सर्किट ब्रेक लागेको हो।

पहिलो १ घण्टामा ४ प्रतिशत बढे २० मिनेटको लागि कारोबार बन्द हुने नेप्से  कारोबार सुरु भएको २ घण्टामा ५ प्रतिशत बढे ४० मिनेटको लागि बन्द हुने व्यवस्था छ। यस्तै ६ प्रतिशतले नेप्से सूचक बढे दिनभरिको लागि कारोबार बन्द हुन्छ।

आइतबार सूचक ६ प्रतिशत बढेर तेस्रो पटक सर्किट ब्रेक लागेपछि कारोबार बन्द भएको हो। दोस्रो पटक खुलेको २ मिनेटमा नै तेस्रो पटक सर्किट ब्रेक लागेको थियो।

आइतबार सेयर बजारको परिसूचक नेप्से १११ अंक बढेको छ। नेप्से १९६३ अंकमा कायम भएको छ। आइतबार ९ मिनेट कारोबार हुँदा जम्मा ४८ करोड २४ लाख रुपैयाँको कारोबार भयो।

शुक्रबार नेपाल राष्ट्र बैंकले मौद्रिक नीतिको पहिलो त्रैमासिक समीक्षा गरेको थियो। उक्त समीक्षामा सेयर धितोमा जाने कर्जाको जोखिमभार १५० प्रतिशतबाट झारेर १२५ प्रतिशत कायम गरिएको थियो। राष्ट्र बैंकले लिएको यो कदमपछि लगानीकर्तामा मनोबल बढेको विश्लेषण गरिएको छ।