‘मासुचिउरा खाने’बाहेक काम नभएको भन्दै पोखरा महानगरका वडासदस्य रुष्ट

पोखरा- पोखरा महानगरपालिकाका वडा सदस्यहरू नेतृत्वप्रति रुष्ट हुन थालेका छन्। पोखरा महानगरपालिका-३३ का वडासदस्यहरूको नेतृत्वमा ३४ जना वडा सदस्यहरूले छुट्टै भेला गरेका हुन्।

भेला दि भिलेज रेस्टुरेन्टमा भएको थियो। बुधबार भएको छलफलमा माघ ११ गते आ–आफ्नो खर्चमा वनभोज तथा वडा सदस्यको क्षमता अभिवृद्धि कार्यक्रम गर्ने निर्णय गरेका छन्। छलफल कार्यक्रममा विभिन्न दलबाट निर्वाचित सदस्यहरू सहभागी थिए।

विगतमा पनि नगरसभा सदस्यहरूले नगरसभामा ताली बजाउने र मासुचिउरा खानेबाहेक अरु नभएको गुनासो गर्दै आएका थिए।

यस्तै पोखरा महानगरपालिकाले वडाध्यक्षलाई काम ,कर्तव्य र अधिकारबारे तालिम गरिरहँदा वडासदस्यका लागि कुनै कार्यक्रम नराखिएको भन्दै गुनासो उनीहरूको थियो।

‘हो त हामी नगरसभा सदस्यको कुनै औचित्य नै छैन यी त कठपुतली हुन् भन्ने सोच पालेर बसेका छन्, हामी वडा सदस्यहरूले नै महानगरको सान र गरिमा लाई जोगाएको कुरा बोध गराउने प्रण गरेका छौँ,’ भेलामा सहभागी एक वडा सदस्यले भने।

१४औँ नगरसभामा वडा सदस्यले आफ्ना कुरा राख्न खोज्दा सुनवाई भएको थिएन। पुस २९ गते महानगरको हिउँदेसभा बोलाइएको थियो। तर कर कै विषय नै सम्बोधन हुन नसक्दा नगर सभा स्थगित भई माघ १८ गतेका लागि सारिएको छ।

पोखरा महानगरपालिकाका प्रवक्ता मोती तिमिल्सिनाले आर्थिक ऐनमा राजस्वसम्बन्धी विषय संशोधन गर्नुपर्ने भएको तर त्यसको तयारी नपुगेका कारण माघ १८ गतेका लागि सभा स्थगित भएको जानकारी दिएका थिए।