६० किलो सुन तस्करी : ६ अभियुक्तलाई थुनामुक्त गर्न आदेश

पाटन- ६० किलो सुन प्रकरणका ६ जना अभियुक्तलाई थुनामुक्त गर्न अदालतले आदेश दिएको छ। उच्च अदालत पाटनले १२ अभियुक्तलाई थुनामा पठाउने काठमाडौँ जिल्ला अदालतको आदेशलाई निरन्तरता दिँदै ६ अभियुक्तलाई भने धरौटीमा रिहा गर्ने आदेश गरेको हो।

काठमाडौँ जिल्ला अदालतले १८ जनालाई नै पुर्पक्षका लागि थुनामा पठाउने आदेश गरेको थियो।

उच्चका न्यायाधीशद्वय धीरबहादुर चन्द र कृष्णराम कोइरालाको इजलासले ६ जनालाई धरौटीमा छोड्ने आदेश गर्दा १२ जनालाई भने थुनामा नै राख्नुपर्ने आदेश गरेको हो।

थुनामुक्त हुन आदेश पाउनेमा कृष्णकुमार श्रेष्ठ, पुष्करराज भट्ट, गणेशप्रसाद पौडेल, वीरेन्द्र नेपाली, सुदर्शन गौतम र यादव पराजुली छन्।

तर दावा छिरिङ, टासी भन्ने धुप्तिन छिरिङ, शिवकुमार सर्राफ, हर्कराज राई, दिलिप भुजेल, रामकुमार भुजेल, राजेन्द्रकुमार राई, सुमन खरेल, किशोर बस्नेत, सरोज श्रेष्ठ, कुमार ढकाल र सन्तोष चन्दलाई थुनामा पठाउने जिल्लाको आदेश उच्चले पनि सदर गरेको छ।

थुनामुक्त हुन आदेश पाउनेमध्ये श्रेष्ठ र भट्टसँग जनही एक लाख रूपैयाँ धरौटी माग गरिएको छ। पौडेल र नेपालीसँग जनही पाँच लाख रूपैयाँ र गौतम र पराजुलीबाट जनही दुई लाख रूपैयाँ धरौटी लिने आदेश भएको छ।

केन्द्रीय अनुसन्धान ब्युरोले यो प्रकरणमा २६ जनालाई पक्राउ गरी अदालतमा मुद्दा पेस गरेको थियो। जिल्लाको आदेशविरूद्ध १७ जनाले दिएको निवेदनमा बुधबार उच्च अदालतले आदेश गरेको हो।

यो प्रकरणमा मुछिएका कलैया उपमहानगर-१ बस्ने भोला साह सोनार, बर्दिया घर भई काठमाडौं चुनदेवी बस्ने जीवन चलाउने र रोल्पा घर भई ठमेलमा भियना होटल सञ्चालन गर्दै आएका अमला रोका फरार छन्।

यस प्रकरणमा केन्द्रीय अनुसन्धान ब्युरोले २९ जनालाई मुद्दा चलाउन सिफारिस गरेको थियो। त्यसपछि सरकारी वकिलले २९ जनाविरूद्ध भदौ ३१ गते काठमाडौं जिल्ला अदालतमा मुद्दा दायर गरेको थियो।

संगठित अपराध निवारण ऐन २०७०, भन्सार ऐन २०६४ को दफा ५७ (१) (घ) को १ (ख), नेपाल राष्ट्र बैंक ऐन २०५८ को दफा ९५ र मुलुकी अपराध संहिता २०७४ को दफा ४३ को एकीकृत कसुरमा मुद्दा दर्ता गरेको थियो।

६० किलो ७१६ ग्राम सुन प्रकरणमा ५० जना संलग्न रहेको सिआइबीको निष्कर्ष थियो।

साउन २ गते त्रिभुवन अन्‍तर्राष्ट्रिय विमानस्थल भन्सार कार्यालयबाट छुटेको ब्रेक-शु राजस्व अनुसन्‍धान विभागले बरामद गरेको थियो। दिलिप भुजेलको नाममा रहेको रेडी ट्रेड प्रालिले उक्त ब्रेक-शु मगाएको थियो।

यही कम्पनीले यसअघि नै ३०२ किलो सुनसमेत तस्करी गरेको सीआईबीको अनुमान थियो। त्यसैको आधारमा सरकारी वकिल कार्यालयले ३६२.७७८ किलोग्राम सुनको बिगो मागदाबी गरेको छ। ३ अर्ब ५० करोड २ लाख १६ हजार ५५२ रूपैयाँ बिगो मागदाबी गरेको हो।