एनसेलको सेयर किनबेचबारे छानबिन समितिले बुझायो प्रतिवेदन

काठमाडौँ- निजी क्षेत्रको दूरसञ्चार कम्पनी एनसेलको सेयर किनबेचबारे गठित उच्चस्तरीय छानबिन समितिले प्रतिवेदन बुझाएको छ।

प्रधानमन्त्री पुष्पकमल दाहाल ‘प्रचण्ड’लाई समितिले सोमबार प्रतिवेदन बुझाएको हो।

निर्धारित समयमा काम नसकेपछि थप १५ दिनको म्याद लिएको समितिले प्रतिवेदन बुझाएको हो।

समिति संयोजक टङ्कमणि शर्माले प्रधानमन्त्री प्रचण्डलाई प्रतिवेदन हस्तान्तरण गरे।

सरकारलाई जानकारी नदिएर मलेसियन कम्पनी आजियाटाले एनसेलको सेयर बेलायती कम्पनी स्पेक्ट्रलाईटलाई बेचेको थियो ।

सो खरिद–बिक्री सम्झौतापछि राजनीतिक दलदेखि संसद्सम्म छानबिनको माग उठेपछि सरकारले समिति गठन गरेको थियो।

मङ्सिर २१ गते ५ सदस्यीय छानबिन समिति गठन गरेको थियो। यो समितिले पुस २४ गते भित्रमा प्रतिवेदन बुझाउन पर्ने हो।

तर, संयोजक शर्मा बेलायत पुगेपछि प्रतिवेदन समयमा बुझाउन ढिला भएको थियो।

सरकारले थप १५ दिन समय थप गरेको थियो।

समितिमा नेपाल सरकारका सचिव फणिन्द्र गौतम, अर्थमन्त्रालयका सहसचिव रितेशकुमार शाक्य, सञ्चार तथा सूचना प्रविधि मन्त्रालयका सहसचिव बाबुराम भण्डारी र नेपाल चार्टर्ड एकाउन्टेन्ट्स संस्था (आइक्यान)का अध्यक्ष सुजनकुमार काफ्ले सदस्य थिए।