हजार र ५ सयका नोट प्रतिबन्ध गरौँ : अर्जनुनरसिंह केसी

काठमाडौँ- कांग्रेस केन्द्रीय सदस्य अर्जुननरसिंह केसीले एक हजार र ५ सयका नोट प्रतिबन्ध लगाउनुपर्ने प्रस्ताव पेस गरेका छन्। मुलुकको मुद्रालाई कालोधनको माध्यम बन्न नदिन यी नोटमाथि प्रतिबन्ध लगाउनुपर्ने उनको प्रस्तावमा उल्लेख छ।

पार्टीको महासमिति बैठकमा बुधबार प्रस्ताव पेस गर्दै उनले विमुद्रीकरणको अवधारणा अघि सारेका हुन्।

‘राजनीतिमा लागेका हामीजस्ता व्यक्तिहरूले बोराका बोरा पैसा लुकाएर राखेका छन्। कोठाभरि पैसाको गोदाम नै बनाएका छन् भन्ने जनतामा भ्रमपूर्ण सन्देश पुर्‍याइएको छ,’ केसीको प्रस्तावमा उल्लेख छ, ‘माफिया, बिचौलिया, कालोधनका धनपतिहरूले सत्तामा पकड जमाएका छन् भन्ने आम विश्वास छ। देशको मुद्रालाई कालोधनको माध्यम बन्न नदिन विमुद्रीकरण गनुपर्ने आवश्यकता छ। त्यसैले एक हजार र पाँच सयका नोटमा प्रतिबन्ध लगाउनेसम्मको कदम चलाउन सरकार तयार हुनुपर्छ र कांग्रेसले नै यसको नेतृत्व लिने आँट गर्नुपर्छ।’

उनले वित्तीय अराजकता र अनुशासनहीनता पराकाष्ठामा पुगेको उल्लेख गरेका छन्। भ्रष्टाचार विरोधको नारा भाषणमा मात्र सीमित भएको उनको भनाइ छ।

भ्रष्टाचारका सबै काण्डहरूको छानबिनको लागि पूर्वप्रधानन्यायाधीशको संयोजकत्वमा देशले भरोसा गर्न सक्ने व्यक्तिहरूको शक्तिसम्पन्न न्यायिक आयोग गठन गर्नुपर्ने पनि उनले प्रस्ताव गरेका छन्।