सहकारी ठगीमा प्रेस चौतारी कास्कीका अध्यक्ष कारागार चलान

पोखरा- पोखरास्थित मित्रमिलन बचत तथा ऋण सहकारी संस्थाको करोडौँ रकम घोटला गरेको आरोपमा पक्राउ परेका पत्रकार अर्जुन गिरी कारागार चलान भएका छन्।

बुधबार कास्की जिल्ला अदालतका न्यायाधीश रामचन्द्र शर्माको एकल इजलासले गिरीलाई पुर्पक्षका लागि कारागार चलान गर्न आदेश दिएको हो। गिरी प्रेस चौतारी नेपाल कास्कीका अध्यक्ष पनि हुन्।

यही प्रकरणमा पोखरा-२१ का वडाध्यक्ष दीपक सुवेदी रिहा भएलगत्तै पुनः पक्राउ परेका छन्। सुवेदी मंगलबार धरौटीमा रिहा भएलगत्तै पुनः पक्राउ परेका हुन्। सहकारी ठगीमा साधारण तारेखमा रिहा भएका उनलाई ठगी मुद्दामा फेरि पक्राउ गरिएको प्रहरीले जानकारी दिएको छ।

पोखराको मित्रमिलन सहकारी ठगी प्रकरणका प्रतिवादी वडाध्यक्ष सुवेदी लामो समयसम्म फरार रहेकोमा मंगलबार मात्र कास्की जिल्ला अदालत हाजिर भएका थिए। उनलाई न्यायाधीश चन्द्रकान्त पौडेलको इजलासले ८ लाख धरौटीमा रिहा गर्ने आदेश दिएको थियो।

उनीमाथि मिटरब्याजी कारोबार गरेको र राजस्व छली गरेको अभियोग छ। गत स्थानीय तहको निर्वाचनमा सुवेदी एमालेबाट विजयी भएका थिए।

तर, त्यसलगत्तै वडाध्यक्ष सुवेदीलाई शान्ति केसीको जाहेरीले ठगी मुद्दामा पक्राउ गरिएको जिल्ला प्रहरी कार्यालय कास्कीका प्रवक्ता डीएसपी श्रवणकुमार विकले बताएका थिए।

सहकारी ठगी अभियोगमा ३३ जना प्रतिवादीविरुद्ध पक्राउ पुर्जी जारी भएकोमा हालसम्म अदालतले वडाध्यक्ष सुवेदीसहित ७ जनालाई धरौटीमा छाड्न आदेश दिइसकेको छ। यसअघि नै ६ जना पुर्पक्षका लागि कारागार चलान भएका छन् भने बाँकी आरोपित हरू भने फरार छन्।

जिल्ला सरकारी वकिल कार्यालयले प्रतिवादीविरुद्ध कानुनबमोजिम सजाय र ३१ करोड ७८ लाख २२ हजार ८ सय ११ रुपैयाँ बिगो माग दाबी गरी मुद्दा दायर गरेको थियो।

पोखरा महानगरले गरेको अध्ययनले सहकारीको रकम गैरकानूनी रुपमा अपचलन गरी मिडिया, रेष्टुरेन्ट, घरजग्गालगायतमा लगानी भएको पाइएको छ।