संकटमा पनि सम्झौता नगर्ने हाम्रो प्रतिबद्धता

नेपाल क्लिक्स डटकम आजदेखि दोस्रो वर्षमा प्रवेश गरेको छ। यो एक वर्ष हाम्रा लागि विविध कारणले महत्त्वपूर्ण रह्यो। खासगरी समग्र अर्थतन्त्र कमजोर अवस्थामा रहेको बेला हामी पाठकसामु आएका थियौँ। त्यसको प्रत्यक्ष-अप्रत्यक्ष असर हाम्रा आफ्नै अपेक्षा र काममा पनि देखियो। यो चुनौती हाम्रा लागि एकप्रकारको सिकाइ भयो।

कठिन अवस्थामा पनि नेपाल क्लिक्सलाई पाठकले देखाउनुभएको सदाशयता, प्रतिक्रिया र आलोचनाले हामीलाई अझ जिम्मेवार र संयम बन्न प्रेरित गरेको छ। सञ्चारकर्म र पत्रकारिता व्यावसायिक रुपमा जतिसुकै संकटमा पनि परे पनि व्यावसायिक धर्म र दायित्वमाथि सम्झौता हुनुहुँदैन भन्ने मूलमन्त्र कहिल्यै डगमगाउने छैन। पाठकहरुसामु हाम्रो यो प्रतिबद्धता सदा कायम छ।

पत्रकारिता प्रश्नमा मात्र जिवन्त रहन सक्छ। धारिलो प्रश्न उठान गरी राज्यका अंग र सरोकारवालाहरूलाई उत्तरदायी बनाउनुपर्ने जिम्मेवारी पत्रकारिताको हो। यो मूल मर्मबाट हामी कति पनि विचलित छैनौँ। लोकतन्त्रका मूलभूत मान्यताहरूलाई आत्मसात गर्दै जिम्मेवार प्रश्नलाई साधन बनाएर जिम्मेवार पत्रकारिताको अभ्यास गर्ने गर्ने हाम्रो प्रतिबद्धता थप बलियो बनेको छ।

हामी बरु गतिमा धिमा नै हौँला, तर पत्रकारिता र लोकतन्त्रका मूल्यमान्यतामा कुनै हालतमा सम्झौता गर्ने छैनौँ। हामी हाम्रो गन्तव्यमा प्रष्ट छौँ। जतिसुकै लामो यात्रा पनि पहिलो पाइलाबाट नै सुरु हुने हो। लामो यात्रा गर्ने दूरदृष्टिका साथ सुरु गरेको डिजिटल पत्रकारिताको यात्रा दोस्रो वर्षसम्म आइपुग्दा हाम्रा थुप्रै अनुभवहरूले आगामी दिनमा आइपर्ने चुनौती सामना गर्न हामीलाई सिकाएको छ।

राज्यप्रणालीमा सत्ता र शक्ति हातमा लिएकाहरूप्रति मूलतः आलोचनात्मक दृष्टिकोणलाई नै हामी प्रश्रय गर्नेछौँ। समाजसोपानको कमजोर वर्गमाथि शक्तिसम्पन्न वर्गले गर्ने विभेदप्रति हामी बुलन्द आवाज उठाउनेछौँ। स्थापनाकालदेखि नै हामी संख्यात्मक भन्दा गुणात्मक समाचार प्रकाशन गर्ने हुटहुटीमा छौँ। सत्यतथ्य, खोजमूलक र विश्लेषणात्मक समाचार पस्कने उद्देश्यमा थप कटीबद्ध छौँ। दोस्रो वर्ष प्रवेश गरेको उपलक्ष्यमा नेपाल क्लिक्स डटकममा प्रकाशन गरिने सामग्रीको दायरा थप विस्तार गर्दै लैजाने प्रण गर्दछौँ।

हामीले यो यात्रा सुरु गर्दादेखि आजसम्म पनि देशको अर्थतन्त्र धराशायी भएको विषयमा चिन्ता र चासो उतिकै छ। समग्र देशको अर्थतन्त्र नै प्रभावित हुँदा निजी क्षेत्र र विज्ञापन बजार पनि प्रभावित छ। आर्थिक गतिविधि खुम्चिँदा त्यसको प्रत्यक्ष मारमा विज्ञापन बजार र मिडियामा परेको छ। यस्तो कठिन परिस्थितिमा पनि हामीलाई विश्वास गरी सहयोग गर्नु हुने विज्ञापनदाताहरूप्रति कृतज्ञ छौँ।

सम्पूर्ण पाठक, दर्शक, लेखक, विज्ञापनदातालगायतसँग आगामी दिनमा थप अन्तर्क्रिया र सहयोग प्राप्त हुन विश्वास लिएका छौँ।