यातायातमन्त्रीलाई नाडाले दियो सुझाव

काठमाडौँ- नाडा अटोमोबाइल्स एसोसिएशन अफ नेपालले उपप्रधानमन्त्री, भौतिक पूर्वाधार तथा यातायातमन्त्री रघुवीर महासेठसँग भेटघाट तथा छलफल गरी विभिन्न सुुझाव पेस गरेको छ।

नाडाका अध्यक्ष करण चौधरीको नेतृत्वमा गएको एक प्रतिनिधी मण्डलले मन्त्री महासेठसँग भेटघाट गरी सुझाव दिएको हो। अध्यक्ष चौधरीले सो मन्त्रालयसँग सम्बन्धित नाडाको विभिन्न सुझावहरु पेश गर्दै सम्बोधन र समाधानका लागि आग्रह समेत गरेका छन्।

सडक मर्मत सम्भार दस्तुर, सवारी साधन कर, सवारी साधनहरु सडकमा गुडेपछि मात्र सवारी कर लाग्ने व्यवस्था, अटोमोबाइल कम्पनीको दर्ता प्रक्रिया, इम्बोस्ड नम्बर सवारी साधनमा अनिवार्य लागु गर्ने, दुईपांग्रे सबारी साधनलाई अत्यावश्यकीय सवारी साधनको रुपमा लिनुपर्ने, सवारी साधन कर तिर्ने व्यवस्था सहज हुनुपर्ने, नामसारी, करको भुक्तानी अनलाइन मार्फत गर्ने प्रणाली हुनुपर्ने सुझाव दिएको छ।

त्यस्तै अन्य सुुझावहरुमा जरीवानाको दायरा, सरुवा सहमती, सवारी साधन पैठारीकर्ताको लागि छुट्टै डेस्कको स्थापना, सेवाग्राहीलाई सुविधा, रसिदमा एकरुपता हुनुपर्ने, मोटरसाइकल प्रयोगकर्ता दुवैले हेलमेट लगाउनुपर्ने, लाईसेन्स वितरण सहज हुनुपर्ने, दुईपाँग्रे सवारी साधनको वर्गीकरण, सहजीकरणको भूमिका निर्वाह, उच्चस्तरका सवारी साधनको लागि हरियो स्टिकर दिने प्रक्रिया, पाकिङ्गस्थलको अभाव रहेका छन्।

विशेष आर्थिक क्षेत्र वा औद्योगिक ग्रामको निर्माण, चारजिङ्ग स्टेशनको निर्माण र विद्युतिय सवारी साधनको व्यवस्था, सवारी चालक तालिमको व्यवस्था, अटोमोवाइल वर्कशपमा रोजगारीको व्यवस्था, अन्तर्राष्ट्रियस्तरको प्रदर्शनी स्थल निर्माण, सिमेण्ट मिक्सरको काम गर्ने सवारी साधनको आयातका सम्बन्धमा सुझावहरु मन्त्री महासेठलाई नाडाले पेस गरेको छ।

मन्त्री महासेठले सवारी साधनको सि.सि.को आधारमा इम्बोष्ड नम्बर प्लेट जारी गर्न सकिने र प्रदेश तहका समस्याहरु छन् भने प्रदेश सरकारमा नै सुझावहरु राख्न सकिने बताए। सोही छलफलको क्रममा उपप्रधानमन्त्री महासेठले मोटरसाइकलको वर्गीकरण सीसीको आधारमा गर्न सकिने भन्दै सवारी साधनको लागि पार्किङको सुविधा सम्बन्धित वडा कार्यालयले गर्ने, सेवाग्राहीलाई सुविधा दिनुपर्ने विषयमा विशेष चासो राख्दै नाडाले राखेका सुझावका सम्बन्धमा आवश्यक पहल गरिने आश्वासन दिएका छन्।

छलफलमा सहभागी नाडाका सचिव विक्रम सिंघानियाले प्रिजेन्टशन मार्फत समेत ती विषयहरुमा जानकारी गराए। मन्त्रालयका सचिव केशवकुमार शर्मा तथा विभागका अन्य अधिकारीहरु, नाडाका वरिष्ठ उपाध्यक्ष आकाश गोल्छा, उपाध्यक्ष राजनबाबु श्रेष्ठ लगायत छलफलमा सहभागी रहेका थिए।