उपेन्द्रलाई अशोकको जवाफ : अदालतको ढोका खुला छ

काठमाडौँ- जनता समाजवादी पार्टी, नेपालका अध्यक्ष उपेन्द्र यादवलाई जनता समाजवादी पार्टीका अध्यक्ष अशोक राईले अदालत जान सुझाव दिएका छन्।

आफू विदेश रहेको बेला पैसाको चलखेल गरी पार्टी फुटाएको आरोप उपेन्द्रले लगाएपछि राईले यस्तो जवाफ फर्काएका हुन्।

 नयाँ दल गठन भएपछि राईले बिहीबार काठमाडौंमा पत्रकार सम्मेलन गर्दै संविधान र कानुनसम्मत आफूहरूले पार्टी गठन गरेको जिकिर गरे।

पार्टीमा यादवले एकलौटी गरेको र आफू पक्षका नेताहरूलाई  पार्टीको जिम्मेवारीबाट बाहिर निकाल्ने तयारी गरेको सूचना पाएपछि आफूहरूले दल विभाजन गर्नुपरेको उनको भनाइ थियो।

‘अदालतको ढोका सबैका लागि खुला छ। हाम्रो पार्टी अनियमिति, गैरसंवैधाानिक, गैरकानुनी ढंगले दर्ताको प्रयत्न भएको होइन। निर्वाचन आयोगले वकिलहरूको, कानुनविदहरूको बहस छलफल समेत गराएको हो,’ उनले भने, ‘उहाँहरू जान सक्नुहुन्छ, अदालतको ढोका सबैका लागि खुला छ। संविधानसम्मत ढंगले नै दर्ता भएको पार्टीलाई अन्यथा हुने अवस्था होइन।’

पार्टी महासचिव मोहम्मद इस्तियाक राईले पार्टी कमिटीले गरेका निर्णय यादवले अस्वीकार गर्दा समस्या आएको र पार्टी विभाजनसम्म पुगिएको बताए।