सत्ता जोगाउन आफैले गरेको निर्णय मानेनन् जम्कट्टेलले, दोस्रो पटक फुटाए मन्त्रालय

काठमाडौँ- आफ्नो कार्यकालमा दोस्रो पटक मन्त्रालय फुटाएर बागमती प्रदेशका मुख्यमन्त्री शालिकराम जम्कट्टेलले सरकार जोगाउन लागिपरेका छन्। उनले आफैले गरेको पहिलो निर्णयको खिल्ली उडाउँदै मन्त्रालय फुटाउने खेलमा लागेका हुन्।

प्रदेशसभाको दोश्रो कार्यकालमा एमालेको समर्थनमा मुख्यमन्त्री बनेका जम्कट्टेलले पहिलो निर्णयनै मन्त्रालयको संख्या कटौती गर्ने र चुस्त दुरुस्त प्रदेश सरकारलाई भार नपर्नेगरि मन्त्रालय बनाउने थियो। तर सत्ता गठवन्धनको कारण आफ्नो सरकार जोगाउन उनले हालसम्म दोश्रो पटक मन्त्रालय विभाजन गरिसकेका छन्।

बागमती प्रदेशको मन्त्रीपरिषद बैठकले माओवादी केन्द्रकी नेतृ कुमारी मोक्तानको जिम्मामा रहेको सामजिक विकास मन्त्रालय फुटाएर युवा तथा खेलकुद मन्त्रालय बनाएको छ।

अब उक्त मन्त्रालयको जिम्मेवारी एकीकृत समाजवादीको तर्फबाट विना विभागीय मन्त्री रहेकी रमा आलेमगरलाइ दिने भएको छ।

गत चैत्र ११ गते बागमती प्रदेशको विना विभागीय मन्त्री नियुक्त भएकी आलेमगरको लागि मन्त्रालय फुटाएसङ्गै अब बागमती प्रदेशमा १३ वटा मन्त्रालय भएको सरकारका प्रवक्ता तथा आन्तरिक मामिला तथा कानूनमन्त्री गङ्गा नारायण श्रेष्ठले जानकारी दिए।

मुख्यमन्त्री जम्कट्टेलले यस अघि काङ्ग्रेससँगको सहकार्यको सरकारमा पनि उनले काङ्ग्रेसका रामकृष्ण चित्रकारको लागि पर्यटन, उद्योग तथा सहकारी मन्त्रालय विभाजन गरेर उद्योग, वाणिज्य, भूमि तथा प्रशासन मन्त्रालयको जिम्मेवारी दिइएको थियो।

काङ्ग्रेसले सरकारलाइ दिएको समर्थन फिर्ता लिएर प्रतिपक्षी भुमिकामा पुगेपछि पुनः विश्वासको मतको लागि मनाउनको लागि उनले समाजवादी सभासद आलेलाई मन्त्रालय दिने सहमती गरेका थिए।