प्रकाशकीय : आरम्भ भयो हाम्रो यात्रा

नेपाली मिडियाको पछिल्लो तस्बिरबारे अनेक कोणबाट बहस भइरहेको छ। मिडियाको चरित्र र कर्तव्यलाई मियोमा राखेर यति धेरै आलोचना र सद्भाव यसअघि कहिल्यै प्रकट भएको थिएन। इन्टरनेटमा पाठक, दर्शक र श्रोताको पहुँच बढ्दै गएपछि त झन् मिडिया विमर्शको अनुक्रम अझै फैलिएको छ। सामाजिक सञ्जालमार्फत् पाठकले मिडिया सामग्रीहरुबारे शीघ्र प्रतिक्रिया दिने अवस्था छ। यसले स्वयं मिडियाले पनि आफूलाई यथासक्य छिटो परीक्षण र पुनः परीक्षण गर्ने स्थिति छ।

मिडियामाथिको आलोचनाको वजन र सन्दर्भको अर्थ एकठाउँमा होला तर हामीलाई के थाहा छ भने मिडियाको खास धर्म भनेको प्रश्न नै हो। मिडियासँग प्रश्न जति बलियो र धारिलो हतियार अर्को हुँदैन। व्यावसायिक पत्रकारिताको घेराभित्र उभ्भिएर गरिने हरेक प्रश्नको सान्दर्भिकता कुनै न कुनै रुपमा जनचासोसँग जोडिएको हुन्छ; जनभावानासँग जोडिएको हुन्छ। राजनीति, समाज, कार्यपालिका, न्यायपालिका र व्यवस्थापिका मात्र होइन, तमाम निजी क्षेत्रसँग हाम्रा प्रश्नहरु कहीँकतै छिप्ने छैनन्। लुक्ने छैनन्। प्रश्न नै हाम्रो निरन्तर प्रक्रियाको हिस्सा रहने छ।

होमपेज मिडिया एउटा संयुक्त कर्मसहितको अभ्यास हो। हाम्रो समाचारकक्षको आकार कत्रो हुनेछ भन्ने कुराले त्यति धेरै अर्थ राख्दैन, जति हामीले कसरी र के काम गर्छौँ भन्ने कुराले राख्छ। पत्रकारिताको मूलभूत मूल्य र मान्यता हाम्रो मूल मन्त्र हो। समाजका सबै तह र तप्कादेखि राज्य संयन्त्रका सबै पक्षहरुमा नजर पुर्‍याउन सकियोस् भन्ने चाहन्छौं। उत्पीडित, दमित, सीमान्तकृत र पिँधमा रहेकाको आवाज र स्पन्दन मुखरित गर्न सकियोस् भन्ने चाहन्छौं। जसले समाज र आफ्नो क्षेत्रमा इमान्दारीपूर्वक योगदान दिएको छ त्यसलाई कुनै न हिसाबले उत्प्रेरित गर्न सकियोस् भन्ने चाहन्छौं। हाम्रो कर्मशील चाहनाको आयातन अरु फराकिलो हुनसक्छ तर यत्ति भन्छौं, सत्य र न्यायका पक्षमा लडिरहन सकियोस् भन्ने चाहन्छौं।

नेपालमा सबैभन्दा गतिमय हिसाबले तीव्र बदलावको चक्रमा परेको कुनै व्यावसायिक अभ्यास हो भने त्यो मिडिया नै। ०४६ को राजनीतिक परिवर्तनपछि बजारमा अखबार उदय जुन गतिमा थियो, त्यसको तुलनामा अहिले डिजिटल पत्रकारिताको उदय अझ तीव्र छ। यसले समाचारकक्षको संरचना र सामग्री कहने शैलीलाई समेत प्रभावित पारेको छ। शैली र तरिका जे भएपनि हाम्रा तमाम अभ्यासहरु पत्रकारिताका मूलभूत मान्यताले बाँधिएका हुनेछन्। संविधानप्रदत्त जनताका अधिकारको रक्षाको पक्षमा मात्र होइन देशको सार्वभौमिकता र अखण्डताका पक्षमा पनि हामी दह्रोसँग उभिने प्रतिबद्धता व्यक्त गर्दछौं।

नेपाल क्लिक्स डटकममार्फत् डिजिटल पत्रकारिताको हाम्रो यो अभियानमा जोडिने सबैप्रति हार्दिक धन्यवाद भन्न चाहन्छौं। पाठकको सुझाव, सल्लाह र सद्भावले हामीलाई सधैं उत्साही बनाइरहने छ।

धन्यवाद।

नारायण अमृत
अध्यक्ष/प्रधानसम्पादक
होमपेज मिडिया प्रा.लि
अनामनगर, काठमाडौँ।