सुदूरपश्चिम विश्वविद्यालयले मनायो १५औँ स्थापना दिवस

धनगढी- सुदूरपश्चिम विश्वविद्यालयले १५औं स्थापना दिवस मनाएको छ। सोमबार विश्वविद्यालयका सरोकारवालाको उपस्थितिमा स्थापना दिवस मनाइएको हो।

स्थापना दिवसका अवसरमा कार्यक्रममा विश्वविद्यालयका पदाधिकारी, विद्यार्थीहरू, अभिभावक, शिक्षाविद्, विभिन्न पालिकाका प्रमुख, राजनीतिक दलका नेता र विभिन्न संघसंस्थाका प्रतिनिधिहरूको उपस्थितिमा कार्यक्रम गरिएको थियो।

कार्यक्रममा उपस्थित विभिन्न क्षेत्रका व्यक्तित्वहरूले विश्वविद्यालयको पारदर्शिता र गुणस्तरीय शिक्षामा केन्द्रित हुन विश्वविद्यालयको नेतृत्वलाई सुझाव दिएका थिए।

कार्यक्रमको अध्यक्षता गर्दै सुदूरपश्चिम विश्वविद्यालयका उपकुलपति प्राडा हेमराज पन्तले विश्वविद्यालयको वर्तमान अवस्थाका साथै आगामी चार वर्षका लागि आफ्नो योजना दृष्टिकोणका बारे आफ्नो प्रस्तुति प्रस्तुत गरेका थिए।

समापन मन्तव्यमा उपकुलपति प्राडा पन्तले विश्वविद्यालयलाई सामाजिक र प्राज्ञिक क्षेत्रसँग जोड्न प्रतिबद्ध रहेको बताए। पर्याप्त बजेट विनियोजन गरी अनुसन्धान कार्यमा अभिवृद्धि गर्ने योजना पनि उनले सुनाएका थिए।

कार्यक्रममा विश्वविद्यालयमा ३० भन्दा बढी प्राध्यापक र कर्मचारीलाई ‘दीर्घ सेवा सम्मानपत्र’ प्रदान गरिएको थियो। विश्वविद्यालय स्थापना भएको १५ वर्ष मात्र भएपनि त्यस अघिदेखि नै सेवा सुरु गरेका उनीहरूलाई सम्मान गरिएको हो। २५ वर्षभन्दा बढी समय सेवा गरेका प्राध्यापक तथा कर्मचारीलाई दीर्घ सेवा सम्मान गरिन्छ।

सोही कार्यक्रममा समाजसेवी डिल्लीराज लेखक र लीलाध्वज बस्नेतलाई पनि उनिहरुले विश्वविद्यालय स्थापनाका लागि पुर्‍याएको योगदानको कदर गर्दै सम्मान गरिएको थियो।

कार्यक्रममा राजनीति दलका नेताहरुले विश्वविद्यालयमा राजनैतिक हस्तक्षेप नगर्ने र विश्वविद्यालयका लागि आवश्यक सहयोग गर्ने प्रतिबद्धता जाहेर गरेका थिए।