३५ पैसा पर्ने अन्तशुल्क स्टिकरलाई ८५ पैसामा ठेक्का, मुख्यसचिवविरुद्ध ३८ करोडको भ्रष्टाचार मुद्दा

काठमाडौँ– मुख्यसचिव वैकुण्ठ अर्यालविरुद्ध भ्रष्टाचार मुद्दा दर्ता भएको छ। अख्तियार दुरुपयोग अुनसन्धान आयोगले अर्यालसहित ११ जनाविरुद्ध विशेष अदालतमा भ्रष्टाचार मुद्दा दायर गरिएको जानकारी दिएको हो।

अर्याल भ्रष्टाचारमा संलग्न भएको देखिएपछि आयोगको टोलीले विशेष अदालत पुगेर आइतबार मुद्दा दायर गरेको आयोगका प्रवक्ता नरहरि घिमिरेले जानकारी दिए।

अन्त:शुल्क स्टिकर छपाइमा भ्रष्टाचार भएको अख्तियारको अनुसन्धानमा देखिएको थियो। यो प्रकरणमा आयोगले मुख्यसचिव बैकुण्ठ अर्यालसहित ११ जनाविरुद्ध मुद्दा दायर गरेको हो।

मदिराको बोलतमा राखिने अन्तशुल्क स्टिकर छपाइको क्रममा अर्यालसहितका सरकारी अधिकारीले भ्रष्टाचार गरेको देखिएको अख्तियारको आरोपमा छ।

आन्तरिक राजस्व विभागका लागि अन्तशुल्क स्टिकर छपाइका लागि सेक्युरिटी प्रिन्टिङ प्रेसले टेन्डर आह्वान गरिएको थियो। ४३ करोड ३२ थान स्टिकर प्रतिथान ८५ पैसाका दरमा छाप्ने गरी छपाइको ठेक्का पाएको प्रिन्टसेलसँग सम्झौता भएको थियो।

प्रतिस्टिकर ३५ पैसामा छापिने गरेकोमा ८५ पैसा प्रतिस्टिकरमा छाप्नेगरी ठेक्का लगाएर अनियमितता गरेको भन्दै उजुरी अख्तियारमा पुगेको थियो। यसपछि आयोगले छानबिन अघि बढाएको थियो।

मुद्दा दर्ता भएसँगै मुख्यसचिव अर्याल निलम्बनमा पर्ने भएका छन्। सञ्चार तथा सूचना प्रविधि सचिव हुँदा सुरक्षण मुद्रण विकास समितिको अध्यक्षको हैसियतमा मुख्यसचिव अर्यालविरुद्ध भ्रष्टाचार मुद्दा दायर गरिएको हो।

अख्तियारले अन्त:शुल्क स्टिकर खरिदमा ३८ करोड ६७ लाख १७ हजार ६ सय ४० रुपैयाँ बिगो माग दाबी गरेको छ।

मुख्यसचिव अर्याल, अर्थ मन्त्रालयका बजेट महाशाखा प्रमुख रितेश शाक्य, सुरक्षण मुद्रण केन्द्रका कार्यकारी निर्देशक विकल पौडेलविरुद्ध पनि मुद्दा दायर भएको छ।

आन्तरिक राजस्व विभागका उपमहानिर्देशक टंक पाण्डे, आन्तरिक राजश्व विभागकै तत्कालीन निर्देशक गणेशविक्रम शाही र अधिकृत रवीन्द्रकिक्रम शाही, सूचना प्रविधि केन्द्रका सफल श्रेष्ठसहित  केन्द्रका हरिवल्लभ घिमिरे र लेखा अधिकृत विष्णुप्रसाद गौतमलाई पनि प्रतिवादी बनाइएको छ।

सुरक्षण मुद्रण केन्द्रका तत्कालीन खरिद विज्ञ शक्तिप्रसाद श्रेष्ठ, स्टिकर छपाइको ठेक्का पाएको कम्पनी प्रिन्टसेल प्रालिका निर्देशक केशव शर्मालाई पनि प्रतिवादी बनाइएको छ।