पहिरोले गुल्मीमा एकै घरका ५ जनाको ज्यान लियो, स्याङ्जामा आमाछोरी र बाग्लुङमा दम्पती पुरिए

काठमाडौँ- पहिरोमा पुरिएर गुल्मीमा एकै घरका पाँच जनाको मृत्यु भएको छ।

गुल्मीको मालिका गाउँपालिका-६ ठाटीपोखरीमा पहिरोले पुरिएर एकै परिवारका ५ जनाको मृत्यु भएको हो।

शुक्रबार रातिदेखि परेको अविरल वर्षाका कारण पहिरोमा परी भेषबहादुर विकको परिवारका ५ जनाको मृत्यु भएको गाउँपालिका अध्यक्ष देवीराम अर्यालले बताए।

पहिरोमा परी ज्यान गुमाउनेमा ५५ वर्षीय भेषबहादुर, उनकी श्रीमती ४८ वर्षीया सुन्तली, बुहारी २६ वर्षीया सीता , नातिनी ८ वर्षीया सपना र ८ महिनाकी विपना विकको ज्यान गएको जिल्ला प्रहरी कार्यालय गुल्मीले जानकारी दिएको छ।

स्याङ्जामा आमाछोरी पुरिए
स्याङ्जामा पहिरोले घर पुर्दा आमाछोरीको मृत्यु भएको छ।

स्याङ्जाको फेदीखोला गाउँपालिका-५ बाँगेस्थित दुर्गा जिटीको ढुंगा माटो र टिनले छाएको घर पहिरोले पुरिँदा उनीसँगै उनकी ३ वर्षीया छोरीको मृत्यु भएको हो।

मृत्यु हुनेमा ३१ वर्षीय दुर्गा र उनकी छोरी निकिसा छन्। उनीहरूको घटनास्थलमा नै मृत्यु भएको प्रहरीले जानकारी दिएको छ।

घरमा सुतिरहेको बेला २०/२५ मिटर माथिबाट खसेको पहिरोले उनीहरूलाई पुरेको थियो।

पहिरोले उनीहरू बसेको घर र गोठ पूर्ण रूपमा पुरिएको छ।

उनीहरुको गोठमा रहेको एउटा भैँसीसमेत मरेको प्रहरीले जनाएको छ।

बाग्लुङमा दम्पतीको मृत्यु
बागलुङको गलकोट नगरपालिका–८ काँडेबाँसको बिसौनामा पहिरोमा पुरिएर दम्पतीकै मृत्यु भएको छ।

मृत्यु हुनेमा ५५ वर्षीय प्रेम विक र उनकी श्रीमती ५० वर्षीया वसन्ती छन्।

जिल्ला प्रहरी कार्यालयका अनुसार उनीहरू बसेको घरलाई नै पहिरोले पुरेको थियो।