भागबन्डा मिलाउन गण्डकीमा मन्त्रालय फुटाउँदै कांग्रेस-एमाले

पोखरा- गण्डकीमा कांग्रेस र एमालेबीच भागबन्डा मिलाउनका लागि मन्त्रालय फुटाउने तयारी गठबन्धनले गरेको छ। एमालेलाई ४ मन्त्रालयका दिनका लागि हाल ७ वटा मन्त्रालय रहेको गण्डकीमा १० वटा मन्त्रालय बनाउने तयारी गठबन्धनले गरेको हो।

४ वटा मन्त्रालय नदिए गण्डकी सरकारमा नजाने एमालेले अड्डी कसेपछि मन्त्रालय बढाउन मुख्यमन्त्री सुरेन्द्र पाण्डे सहमत भइसकेका छन्। एमालेलाई ४ मन्त्रालय दिन र १० मन्त्रालय पुर्‍याउने तयारी पाण्डेको छ।

‘मन्त्रालय नबढाई २ वटा एमालेलाई दिएर सरकारमा ल्याउने तयारी सफल हुन नसकेपछि मुख्यमन्त्री मन्त्रालय बढाउन तयार हुनुभएको छ,’ कांग्रेसका एक सांसदले भने, ‘३ वटा मन्त्रालय दिँदा पनि एमाले नमानेपछि १० पुर्याउने भएको छ।’ अब कांग्रेसले ६ मन्त्रालय लिनेछ भने एमालेले ४ वटा।

अहिले गण्डकी सरकारमा कांग्रेसका अतिरिक्त माओवादीको चुनाव चिन्हबाट निर्वाचित नेपाल समाजवादी पार्टीका नेता फणीन्द्र देवकोटा र स्वतन्त्र सांसद राजीव गुरुङ (दीपक मनाङे) पनि छन्। उनीहरूलाई सरकारबाट हटाएपछि मात्र सरकारमा सहभागी हुन सकिने अडान एमालेले राखेको थियो। तर अप्ठेरो समयमा आफूलाई साथ दिएका दुवै सांसदलाई मुख्यमन्त्री पाण्डेले हटाउन चाहेनन्। यसपछि एमालेको शर्त अनुसार उनीहरूलाई कांग्रेसकै कोटामा मन्त्री दिने र आफूहरूलाई ४ मन्त्रालय दिन भनेका थिए।

१० मन्त्रालय पुर्‍याएपछि कांग्रेसले थप एक मन्त्रालय पाउनेछ। एमालेका ४ मन्त्री बन्नेछन्। हाल कांग्रेसबाट मुख्यमन्त्रीसहित ३ जना र मुख्यमन्त्रीलाई मत दिएका देवकोटा र मनाङे मन्त्री छन्।

मन्त्रालयको सङ्ख्या बढाएपछि मन्त्रीहरूको जिम्मेवारीमा पनि हेरफेर गर्ने तयारी पाण्डेको छ। मनाङेलाई युवा तथा खेलकुद मन्त्रालय दिने तयारी छ।

एमालेले भने ४ मन्त्रालय लिने विषयमा कुराकानी भएपनि क-कसलाई सरकारमा पठाउने भन्ने निर्णय भएको छैन।