गण्डकी एमालेले टुंग्यायो ४ मन्त्रीको नाम, सरकारले फुटायो मन्त्रालय

पोखरा- नेकपा एमालेले गण्डकी प्रदेशमा मन्त्री हुने ४ जनाको नाम टुंगो लगाएको छ। बाग्लुङका कृष्ण पाठक, नवलपुरकी पद्मा जिसी, कास्कीका प्रकाशबहादुर केसी र पर्वतका मित्रलाल बस्याल गण्डकीमा मन्त्री बन्न लागेका हुन्।

आइतबार मन्त्रिपरिषद् बैठकले मन्त्रालय फुटाएर ९ वटा मन्त्रालय बनाउने निर्णय गरेको थियो। कांग्रेस र एमालेबीच गठबन्धनमा कांग्रेसले ५ वटा लिने र एमालेलाई ४ वटा दिने सहमतिअनुसार एमालेले ४ जनालाई मन्त्री बनाउन मुख्यमन्त्री सुरेन्द्र पाण्डेलाई नाम सिफारिस गरेको हो।

पर्वतका बस्याल प्रदेशसभाका ज्येष्ठ सदस्य हुन्। नवलपुरकी पद्मा एमाले उपमहासचिव पृथ्वीसुब्बा गुरुङ पक्षधर हुन् भने बाँकी तीन जना खगराज समूहका हुन्।

गण्डकीमा ९ मन्त्रालयमध्ये मुख्यमन्त्री सुरेन्द्रराज पाण्डेलाई साथ दिने नेपाल समाजवादी पार्टीका फणीन्द्र देवकोटा र स्वतन्त्र सांसद राजीव गुरुङ (दीपक मनाङे)लाई पनि कांग्रेस कोटामै राखेर एमालेलाई ४ मन्त्रालय दिइएको हो। एमालेका चारै जना मन्त्रीको आजै सपथ गर्ने तयारी छ।

गण्डकी सरकारमा ७ वटा मन्त्रालय थिए। मुख्यमन्त्रीले भाग मिलाउनका लागि बढाएर ९ मन्त्रालय बनाउने निर्णय गरेका छन्।

मंगलबार बसेकाे मन्त्रिपरिषद्काे बैठकले स्वास्थ्य मन्त्रालय र आन्तरिक मन्त्रालयलाई फुटाइएको हो।

यसअघि २०७९ पुस २५ गते मुख्यमन्त्री हुँदा खगराजले नै १२ बाट ७ मन्त्रालय बनाउने निर्णय गरेका थिए। यसपटक एमालेलाई ४ मन्त्रालय दिनका लागि ९ मन्त्रालय  बनाइएको हो।