गण्डकीका मन्त्री मनाङेको राजीनामा स्वीकृत

पोखरा- गण्डकी सरकारका मन्त्री दीपक मनाङेको राजीनामा स्वीकृत भएको छ।

सोमबार अपरान्ह मनाङेले पेस गरेको राजीनामा स्वीकृत गरेको मुख्यमन्त्री सुरेन्द्रराज पाण्डेले जानकारी दिए।

सोमबार मन्त्रिपरिषद विस्तार गर्दा मुख्यमन्त्री पाण्डेले मनाङेलाई भौतिक पूर्वाधार मन्त्रालयबाट हटाएर वन मन्त्रालयको जिम्मा दिएका थिए।

मुख्यमन्त्रीको निर्णयबाट असन्तुष्ट मनाङेले अपरान्ह स्वकीय सचिव सन्तोष अधिकारीमार्फत राजीनामा पठाएका थिए।

राजीनामा बुझाएपछि अब आफूलाई मन्त्री बन्नका लागि कुनै उत्साह नभएको समेत उनको भनाइ छ। अब रेस्ट गरेर बस्ने उनले बता।

मनाङेले मन्त्रालय विभाजनमा असन्तुष्टि जनाउँदै राजीनामा दिएका थिए।

सरकार पुनर्गठन हुनुअघि उनी भौतिक पूर्वाधार विकास तथा यातायात व्यवस्थामन्त्री थिए। पुनर्गठन भएपछि उनले वन तथा वातावरण मन्त्रालय पाए।

उनले वन मन्त्रालयमा बजेट नहुने भएकाले त्यहाँ जान आफूलाई इच्छा नलागेको बताएका छन्।

मनाङेले सरकार पुनर्गठन हुँदा सामाजिक विकास, युवा तथा खेलकुद मन्त्रालय माग गरेका थिए। तर उक्त मन्त्रालय कांग्रेस सांसद विन्दुकुमार थापालाई दिइएको छ।

‘वनमा बजेट छैन। मन्त्रालय हामीले हेर्न पनि पाउँदैन,’ उनले भनेका थिए, ‘झन्डा हल्लाएर हिँडेर काम छैन। हामीले तितपातीको झ्याङ हेर्ने हो।’

वन तथा वन तथा वातावरण मन्त्रालय मनाङबाटै निर्वाचित भएका प्रदेश सांसद मुनिन्द्रजंग गुरूङले पाएका छन्।

उनलाई पनि राजीनामा दिन मनाङेले आग्रह गरे। ‘तल्लो मनाङको भाइ मुनिन्द्रलाई पनि राजीनामा देउ भनेको छु,’ उनले भने, ‘नयाँ केटाहरुलाई अनुभव हुन्छ।’