देउवापछि प्रचण्डलाई भेटे एमाले नेताले

काठमाडौँ- नेकपा (एमाले) का नेताहरूले नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ लाई भेटेका छन्।

बिहीबार एमालेका नेताहरूले प्रचण्डलाई भेट गरेका हुन्। भेटका लागि एमाले बागमती इन्चार्ज राजन भट्टराई, जिल्ला अध्यक्ष दीपक निरौलासहितको टोलीले भेटेको हो।

काठमाडौँ उपत्यकाका नदी किनारमा मापदण्ड थप गरिएको विषयमा ध्यानाकर्षण गराउन एमाले काठमाडौँका नेताहरू शीर्ष नेतासँग भेटका लागि दौडाहमा छन्।

काठमाडौँ उपत्यकाको बागमती नदी र यसका सहायक नदीमा वारिपारि २०-२० मिटर मापदण्ड छोडेर खोलको बहाव क्षेत्र किटान गर्न परमादेश दिएपछि एमाले आन्दोलित छ।

एमालेले अदालतको फैसलाको न्यायिक पुनरवलोकनको माग गर्दै आएको छ। भेटमा अध्यक्ष प्रचण्डले जनसरोकारका विषयमा माओवादीले साथ दिने बताएको भट्टराईले बताए।

‘अदालतको फैसलाका कारण उत्पन्न समस्याका विषयमा सरकार पुनरवलोकनमा जानुपर्ने विषयमा सहमति जनाउँदै माओवादी केन्द्रले यस किसिमको जनसरोकारको विषयमा आफ्नो दलबाट औपचारिक निर्णय हुने र सरकारले भ्याकेटमा जाँदा आफ्नो दलको समर्थन रहने कुरा बताउनुभयो,’ भट्टराईले भने।

एमाले नेताहरूले प्रधानमन्त्री केपी शर्मा ओली, नेपाली कांग्रेसका सभापति शेरबहादुर देउवालाई भेटेर न्यायिक पुनरवलोकनमा जान ध्यानाकर्षण गराइसकेको छ।