संवैधानिक परिषद बैठकअघि ओली, देउवा र प्रचण्डबीच छलफल

काठमाडौँ- प्रधानमन्त्री एवम् नेकपा एमालेका अध्यक्ष केपी शर्मा ओली, सत्तासाझेदार दल नेपाली कांग्रेसका सभापति शेरबहादुर देउवा र प्रमुख प्रतिपक्षी दल नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ बीच कुराकानी भएको छ।

बिहीबार बालुवाटारमा भएको छलफलमा संवैधानिक परिषद्को बैठकका लागि परामर्श भएको प्रधानमन्त्रीको सचिवालयले जानकारी दिएको छ।

प्रधानमन्त्री केपी शर्मा ओलीले शुक्रबार संवैधानिक परिषद्को बैठक बोलाएका छन्।

यसअघि बुधबार ५ बजेका लागि बैठक बोलाइएको भएपनि अन्तिम समयमा आएर शुक्रबारका लागि सारिएको थियो।

प्रमुख प्रतिपक्षीलगायत दलसँग परामर्श गर्नुपर्ने भएकाले बुधबारको बैठक शुक्रबारका लागि सारिएको प्रधानमन्त्रीको सचिवालयको भनाइ छ।

त्यस्तै प्रधानमन्त्री ओली, देउवा र प्रचण्डबीच पछिल्लो राजनीतिक विषयमा पनि कुराकानी भएको सचिवालयले जानकारी दिएको छ।

प्रधानमन्त्रीको अध्यक्षतामा हुने संवैधानिक परिषदमा प्रधानन्यायाधीश, सभामुख, राष्ट्रिय सभाको अध्यक्ष, उपसभामुख र प्रमुख प्रतिपक्षी दलको नेता सदस्य रहन्छन्।

सत्तासाझेदार एमाले र नेपाली कांग्रेसले संवैधानिक परिषदमा सदस्य रहने उपसभामुख रहेकी इन्दिरा रानामगरले राजीनामा दिनुपर्ने भन्दै माग गरिरहेका बेला प्रधानमन्त्री ओलीले संवैधानिक परिषदको बैठक बोलाएका हुन्।

उता प्रमुख प्रतिपक्षी दल माओवादीले भने उपसभामुखलाई हटाउने कदम चाले प्रतिवाद गर्ने चेतावनी दिएको छ।