२ वर्षमा बन्नुपर्ने पुल ८ वर्षमा बन्यो

तुलसीपुर– दुई वर्षमा निर्माण सम्पन्न गर्नुपर्ने पुल आठ वर्षमा निर्माण भएको छ। यद्यपि पसल बनेपछि स्थानीय खुसी भएका छन्। पुलको शिलान्यास कांग्रेस सभापति शेरबहादुर देउवाले ८ वर्षअघि गरेका थिए।

पुल समयमै नबनेपछि स्थानीयले दबाब दिँदै आएका थिए।

तुलसीपुर उपमहागरपालिका–१५ मा पर्ने डुरुवा–कोठरी जोड्ने हापुरखोलामा निर्माण सुरु भएको आठ वर्षमा पुल निर्माण पूरा भएको हो। विसं २०७५ चैत १८ गते काम पूरा गर्नेगरी सुर्खेतको एसपीय सूर्य जेभी कन्ट्रक्सन निर्माण कम्पनीसँग २०७३ असोज १९ गते सम्झौता भएको थियो।

भ्याटबाहेक रु १० करोड ५० लाख २१ हजार चार सयमा उक्त पुल निर्माण भएको हो। व्यक्तिको स्वामित्वमा रहेको जग्गाका कारण पुल निर्माण विवादमा परेको थियो।

त्यही विवादलाई देखाउँदै पटक–पटक  निर्माण कम्पनीले म्याद थप गरिएको थियो।

यसरी लामो समय पुल नबन्दा वर्षात्को समयमा सवारीसाधन वारपार गर्न समस्या हुने गरेको थियो। तर अहिले पुल बनेपछि निकै सहज भएको अटोचालक सुरेश परियारले बताए।