बार अध्यक्षको प्रश्न- गैरसंवैधानिक काम गर्ने न्यायपरिषद्, मुद्दा खेप्ने हामी?

काठमाडौँ- नेपाल बार एसोसियसनका अध्यक्ष गोपालकृष्ण घिमिरेले आफ्नो असंवैधानिक कामलाई ढाकछोप गर्न न्यायपरिषद्ले आफूविरुद्ध मुद्दा चलाउने तयारी गरिरहेको आरोप लगाएका छन्।

मंगलबार बारको कार्यालयमा आयोजित पत्रकार सम्मेलनमा घिमिरेले आफूविरुद्ध मुद्दा दर्ता भए खेप्न तयार रहेको बताए। ‘असंवैधानिक काम गर्ने न्यायपरिषद् अनि मुद्दा खेप्नुपर्ने हामीले ? हामी तयार छौं,’ सम्मेलनमा घिमिरेको भनाइ थियो।

बार अध्यक्ष घिमिरेको अभिव्यक्तिलाई लिएर सर्वोच्च अदालतले उनीविरुद्ध अवहेलनाको मुद्दा चलाउने तयारी गरेको छ। घिमिरेले न्यायपरिषद अध्यक्ष (प्रधानन्यायाधीश)ले पैसा खाएर सर्वोच्चमा न्यायाधीश नियुक्तिका लागि सिफारिस गरेको आरोप लगाएका थिए। सोही विषयमा परिषदले अवहेलनमा मुद्दा चलाउन लागेको हो।

६ जना दरबन्दी खाली हुन लाग्दा न्यायपरिषद्ले २ जनामात्र न्यायाधीश सिफारिस गरेको थियो। घिमिरेले आफूले दिएको अभिव्यक्तिबारे आउने जुनसुकै मुद्दा खेप्न पनि तयार रहेको बताए।

बारको विरोधकै बाबजुद न्यायपरिषदले सर्वोच्चमा न्यायाधीश सिफारिस गरेको थियो।